İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 722 Hüküm no: 970 Orijinal metin no: [94b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Selim’in evdeki yarım hissesini el-Hâc Yahya b. Sâlih’e sattığı Mahmiye-i İstanbul’da Elvanzâde mahallesi sükkânından Mehmed Çelebi b. Selim meclis-i şer‘de işbu bâ‘isü’l-kitâb el-Hâc Yahya b. Sâlih mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Ahmed Çelebi mülkü ve bir tarafdan benim âhar mülküm ve bir tarafdan el-Hâc Selim mülkü ve bir tarafdan tarîk-i hâs ile mahdûd mülk menzilin nısf-ı şâyi‘i merkūm el-Hâc Yahya’nın mülk-i müşterâsıdır ve nısf-ı şâyi‘i dahi benim mülküm olup ale’l-iştirâk mutasarrıflar iken hâlâ menzil-i mezbûrdan olan nısf hisse-i şâyi‘amı mezbûr el-Hâc Yahya’ya altmış bin akçeye bey‘ ve teslîm ol dahi iştirâ ve tesellüm ettikden sonra semeninden kırk bin akçesini yedinden kabz edip bâkī kalan yirmi bin akçesini dahi menzil-i mezbûra muttasıl mezbûr el-Hâc Yahya’nın mülkü olan sülüs-i menzili mukaddemâ el-Hâc Yahya bana yirmi bin akçeye bey‘ etmekle semeni zimmetimde olan ol sülüs-i menzilin semenine takās edip ben dahi takāss-ı mezbûru kabûl etmekle mezbûr el-Hâc Yahya’nın zimmetinde meblağ-ı mezbûr altmış bin akçeden bir habbe kalmamışdır, ba‘de’l-yevm menzil-i mezbûr cümlesi merkūm el-Hâc Yahya’nın mülk-i müşterâsıdır, benim alâkam kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi şehri Rebî‘ilevvel li sene erba‘a ve seb‘în ve elf. Şuhûdü’l-hâl: Seyyid Mehmed Bey b. Osman, Hacı Sâlim b. Cuma, es-Seyyid Ali eş-Şerîf, Ali Çelebi b. Hacı Sâlim, Mehmed Reis b. Zeyd, Hacı Said b. Osman, Abdülazîz Efendi b. Said, Mehmed b. Sâbit, Said b. Süleyman, Ömer Efendi el-Kâtib ve gayruhüm.