İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 723 Hüküm no: 972 Orijinal metin no: [94b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muharrem b. Şaban’ın yaptırdığı değirmenin Emine Hâtun bt. Mahmud Halife’nin değirmenine herhangi bir zararının olmadığı Vilâyet-i Anadolu’da Benderereğli kazâsına tâbi‘ Danişmendli nâm karye sükkânından işbu râfi‘ü’l-kitâb Muharrem b. Şaban nâm kimesne mahfil-i kazâda, yine karye-i mezbûreden Emine Hâtun bt. Mahmud Halîfe’nin zevci ve tarafından husûs-ı âti’l-beyâna sâbitü’l-vekâle vekîli olan Receb Beşe nâm râcil mahzarında üzerine takrîr-i da‘vâ edip mezkûre Emine’nin karye-i mezbûre kurbunda Kiremit Geçidi demekle ma‘rûf nehr-i cârî üzerinde dâir değirmenine ba‘îd üst yanında kendi malımdan bir değirmen binâ eylediğimde arsa ve binâsında mezbûre Emine ile zevci mezbûr Receb Beşe’nin vechen mine’l-vücûh ve sebebin mine’l-esbâb hak ve alâkası yok iken değirmenime zararı vardır, sen değirmen ihdâs edeli benim değirmenime un öğütmek için buğday getirilmez oldu deyû her bâr beni rencîde etmekle bin yetmiş iki senesi Recebü’l-ferdi’nin onuncu gününde talebimle taraf-ı saltanat-ı aliyyeden Mustafa Çavuş yediyle vârid olan emr-i şerîf-i cihân-mutâ‘ mûcebince kazâ-i mezbûrda hilâfeten müvellâ olan Mevlânâ Mehmed Efendi ve kazâ-i mezbûr hâvî olduğu kurâ ahâlîsi ile üzerine varılıp, muvâcehesinde keşf ve müşâhede olundukda benim değirmenimin vechen mine’l-vücûh mezkûre Emine’nin değirmenine [zarar] olmadığına icmâ‘ ve ittifâk olunmağla, Mevlânâ-yı mezbûr ba‘de’t-tahrîr yedime hüccet-i şer‘iyye verdiğinden gayrı yine kanâ‘at etmeyip tekrârı beni vech-i meşrûh üzre rencîdeden hâlî olmadığı ecilden târih-i senesi Saferü’l-hayrı’nın evâilinde kazâ-i mezbûrda kadı olan Mevlânâ Abdülmuhsin Efendi yedime arz vermişdir, ba‘de’n-nazar ahâlî-i karye-i mezbûreden olup işbu hâzırûn bi’l-meclis Mustafa b. Abdullah ve Abdülcelil b. Sefer ve Halil Beşe b. Resûl ve Oruc Beşe ve Ahmed Beşe b. Osman, Muharrem b. Şaban nâm kimesnelerden dahi husûs-ı mezbûr istihbâr olunmak matlûbumdur deyû mine’l-külli’l-vücûh takrîr-i meşrûhunu nâtıka ve târih-i mezbûr ile müverraha ve Mevlânâ-yı mezbûr Mehmed Efendi imzâsıyla mümzâ ve hâtemi ile mahtûme hüccet-i şer‘iyye ve Mevlânâ-yı mezbûr Abdülmuhsin Efendi imzâsıyla mümzâ ve hatmi ile [95a] mahtûme ve târih-i mezbûr ile müverrah ve mazmûn min külli’l-vücûh takrîr-i meşrûhunu nâtık arz ibrâz edip mezkûr Receb Beşe muvâcehesinde feth ve kırâ’at olunup hâzırûn-ı mezkûrûndan istihbâr olundukda fi’l-vâki‘ müdde‘î-i mezbûr Muharrem’in binâ eylediği değirmenin vechen mine’l-vücûh ve sebebin mine’l-esbâb müvekkile-i mezbûre Emine’nin değirmenine zararı yoktur deyû her biri alâ tarîki’ş-şehâde vekîl-i mezbûr Receb Beşe muvâcehesinde haber verdikden sonra mezbûr Receb Beşe istintâk olundukda kaziyye bâlâda tafsîli mürûr ettiği vech üzre idiğini mu‘terif olmağın mûcebince ba‘de’l-yevm müdde‘î-i mezbûr Muharrem’i rencîde etmemek için mezbûr Receb Beşe’ye tenbîh olunup mâ vaka‘a bi’t-taleb ketb olundu. Fi’l-yevmi’r-râbi‘ [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: El-Hâc Hasan b. Mehmed, Halil Beşe b. Resûl, Mustafa Beşe b. Ramazan, Şaban Beşe b. ( ) kovacı, Mustafa b. Mehmed, Ahmed b. Osman.