İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 724 Hüküm no: 974 Orijinal metin no: [95a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’daki dikici esnafının yaptıkları mest ve papuçların haffaflar çarşısında müzayede ile satılması gerektiği Mahmiye-i İstanbul’da Bâzâristân-ı atîk kurbunda vâki‘ haffâflar ârâstasının kethüdâları Hasan b. Musa ve yiğidbaşıları Bâli Beşe b. Bayram ve Karaman’da vâki‘ ârâstanın kethüdâları Hasan b. Musa ve yiğidbaşıları Mehmed b. Hüseyin ve Avratpazarı’nda vâki‘ ârâstanın kethüdâsı Şaban b. Hüseyin ve Mehmed b. Ahmed ve Tahtakale’de vâki‘ ârâstanın kethüdâsı Mehmed b. Ahmed ve yiğidbaşıları Mehmed b. Abdullah ve Hacı Hasan b. Abdullah ve Süleyman Bey b. Mustafa ve Mehmed b. Ali ve İbrahim b. Hasan ve sâirleri mahfil-i kazâda dikici tâifesinden Hasan b. Abdullah ve Ramazan b. Mustafa ve el-Hâc Ahmed b. el-Hâc Mehmed ve Hasan b. Hüseyin ve sâirleri mahzarlarında her biri takrîr-i kelâm edip kadîmü’l-eyyâmdan berî dikici tâifesi işledikleri papuç ve mesti ârâstalarımıza getirip ba‘de’l-müzâyede bize bey‘ edegelmişler iken hâlâ olagelmişe muhâlif işledikleri papuç ve mesti ârâstamıza getirmeyip bazârlarda yapılıp bey‘ etmeleri ile beynimizde küllî ihtilâle bâ‘is oldukları ecilden ahvâlimizi sa‘âdetlü kāimmakām-ı sadr-ı a‘zam hazretlerine arz-ı hâl ile i‘lâm eylediğimizde, mu‘tâd-ı kadîm değil ise men‘ ve def‘ oluna deyû yedimize buyruldu-i şerîf sadaka ve ihsân buyurmuş idi ba‘de’n-nazar olagelmişe muhâlif bazârlarda yapılıp ve sâir yerlerde koltukçuluk etmeyip kadîmden olageldiği üzre işledikleri papuç ve mesti ârâstalarımızda bey‘ etmeleri için mezkûrûna tenbîh olunmak matlûbumuzdur deyû buyruldu-ı şerîf ibrâz edip mezbûrun muvâcehelerinde nazar ve kırâ’at olundukda takrîr-i meşrûhlarına muvâfık bulundukdan sonra gıbbe’s-suâl mezkûrun cevâblarında kaziyye bâlâda tafsîli mürûr ettiği vech üzre idiğini her biri mu‘terif olmağın ba‘de’l-yevm işledikleri papuç ve mesti ârâstalarda semen-i misli ile bey‘ edip bazârlarda yapılıp ve sâir yerlere koltukçuluk etmemeleri için mezkûrûna tenbîh olunup mâ vaka‘a bi’t-taleb ketb olundu. Fi’l-yevmi’l-hâmis [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Abdülkerim Ağa sermuhzırân, el-Hâc Ahmed b. Mahmud, Abdi Çelebi b. Hüseyin, Veli Çelebi b. Mahmud, Mehmed b. Ramazan ve gayruhüm.