İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 725 Hüküm no: 975 Orijinal metin no: [95a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zaharya v. Yuvan’ın ev ve bağlarını Franko v. Yani’ye sattığı Kasap tâifesinden Zaharya v. Yuvan nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Franko v. Yani nâm zimmî muvâcehesinde ikrâr ve takrîr-i kelâm edip Havâss-ı Aliyye müzâfâtından Çatalca nâm kasaba mahallâtından Büyük mahallede vâki‘ bir tarafı Zafire mülkü ve bir tarafı İskarlo bağı ve iki tarafı tarîk-i âm ile mahdûd tahtânî iki oda ve zât-ı eşcâr-ı müsmire ve gayr-ı müsmire cüneyneyi müştemil menzili ve yine kasaba-i mezbûre kurbunda vâki‘ bir tarafı Ramazan Hoca bağı ve bir tarafı Papa Dimo bağı ve iki tarafı tarîk-i âm ile mahdûd iki dönüm bir kıt‘a bağı ve yine kasaba-i merkūme kurbunda vâki‘ bir tarafı İsteryo bağı ve bir tarafı Piyâle Hoca bağı ve bir tarafı bayır ve bir tarafı tarîk-i âm ile mahdûd bir buçuk dönüm bir kıt‘a bağı, merkūm Franko’ya yirmi bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip semeni olan meblağ-ı mezbûr yirmi bin akçeyi tamâmen yedinden alıp kabz edip mârrü’z-zikr menzil ile bağları mahallinde zabt ve tasarrufa mezbûr Franko’yu taslît eyledim dedikde gıbbe’t-tasdîk, mâ hüve’l-vâki‘ bi’t-taleb ketb olundu. Şuhûdü’l-hâl: Musa Bey b. Ahmed, Mehmed Bey b. Abdullah, İbrahim Çelebi b. Nasûh ve gayruhüm.