İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 726 Hüküm no: 976 Orijinal metin no: [95b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Yahya b. Sâlih’in evdeki sülüs hissesini Mehmed Çelebi b. Selim’e sattığı Mahmiye-i İstanbul’da Elvanzâde mahallesi sâkinlerinden el-Hâc Yahya b. Sâlih nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Çelebi b. Selim mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Murad Beşe mülkü ve bir tarafdan el-Hâc Selim mülkü ve bir tarafdan Kerime Hâtun mutasarrıfe olduğu vakıf menzil ve bir tarafdan ba‘zan benim mülküm ve ba‘zan tarîk-i hâs ile mahdûd olan mülk menzilin sülüs [hisse-i] şâyi‘i benim mülküm olmağla ol sülüs [hisse-i] şâyi‘i mezbûr Mehmed Çelebi’ye yirmi bin akçeye bey‘ ve teslîm ol dahi iştirâ ve tesellüm ettikden sonra semenini merkūm Mehmed Çelebi’den altmış bin akçeye iştirâ ettiğim nısf menzil semeninden kırk bin akçesini teslîm edip bâkī yirmi bin akçesine takās edip ol dahi mukāssa ve kabûl eylemeğin menzil-i sâlifü’z-zikrin sülüs [hisse-i] şâyi‘i mezbûr Mehmed Çelebi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-vicâhî, mâ vaka‘a bi’t-taleb ketb olundu. Fî selhi şehri Rebî‘ilevvel li sene erba‘a ve seb‘în ve elf. Şuhûdü’l-hâl: Seyyid Mehmed Bey b. Gılmân?, Hacı Sâlim b. Cuma, es-Seyyid Ali eş-Şerîf, Ali Çelebi b. Sâlim, Mehmed Reis b. Zeyd, Hacı Said b. Gılmân?, Abdülazîz Efendi b. Said ve gayruhüm.