İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 726 Hüküm no: 977 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Yahya b. Sâlih ile Mehmed Çelebi b. Selim’in birbirlerinin zimmetlerini ibrâ ettikleri Mahmiye-i İstanbul’da Elvanzâde mahallesi sâkinlerinden Hacı Yahya b. Sâlih nâm kimesne meclis-i şer‘-i hatîr-i lâzımü’t-tevkīrde yine mahalle-i mezbûre sâkinlerinden Mehmed Çelebi b. Selim mahzarında ikrâr ve takrîr-i kelâm edip merkūm karındaşım Hacı Salahaddin’in mezbûr Mehmed Çelebi’nin karındaşı merhûm Ali Çelebi’nin zimmetinde deyn-i şer‘îden olan yirmi beş bin akçe hakkı irsen bana intikāl eylemeğin meblağ-ı merkūm yirmi beş bin akçeyi ve mezbûr Mehmed Çelebi zimmetinde olan üç bin akçe hakkımı mesfûr Mehmed Çelebi yedinden tamâmen alıp kabz edip meblağ-ı mezbûr yirmi beş bin akçe da‘vâsından ve târih-i kitâba gelince merkūm Mehmed Çelebi ile mâ beynimizde cârî olan ahz u i‘tâ ve mu‘âmelât-ı şettâ ve mülk menzile müte‘allik cemî‘ da‘vâdan her birimiz âharı ibrâ eyledik dedikde gıbbe’t-tasdîki’l-vicâhî, mâ vaka‘a bi’t-taleb ketb olundu. Hurrire fî târihi’l-mezbûr. Şuhûdü’l-hâl: Es-Sâbikūn.