İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 728 Hüküm no: 980 Orijinal metin no: [96a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan Ağa b. Musa’nın Murad v. Kızıl’ın borcuna kefil olduğu Medîne-i Ebâ Eyyûb-i Ensârî müzâfâtından kasaba-i Hasköy’de Turşucu Hüseyin Çelebi mahallesinde sâkin fahrü’l-a‘yân Ramazan Ağa b. Musa meclis-i şer‘-i hatîrde işbu hâmilü’s-sifr Manuk v. Melkon nâm Ermeni mahzarında ikrâr ve i‘tirâf edip mezkûr Manuk’un gāib ani’l-meclis Murad v. Kızıl nâm Ermeni zimmetinde cihet-i karz-ı şer‘îden her bir kese kırk bin akçe olmak üzre beş kese içinde memlû iki yüz bin fıddî râyic fi’l-vakt akçe hakkı olup meblağ-ı mersûm iki yüz bin akçeyi gāib-i mezbûr Murad târih-i kitâbdan otuz gün tamânında mezkûr Manuk’a edâ ve teslîm etmezse meblağ-ı mezbûra ben zâmin ve kefîl oldum dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Yusuf b. Abdullah, Mehmed b. Ahmed, Mehmed b. Nasûh, Ali Ağa b. Hüseyin, Abdülkerim Ağa b. ( ), el-Hâc Ahmed b. Mahmud ve gayruhüm.