İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 729 Hüküm no: 981 Orijinal metin no: [96a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lârî Mehmed Efendi b. Mustafa’nın, Haçam Perez’de olan alacağını alarak zimmetini ibrâ ettiği Mahmiye-i İstanbul’da merhûme Vâlide Sultan binâ eylediği hânda sâkin Lârî Mehmed Efendi b. Mustafa tarafından meblağ-ı âti’z-zikri kabz ve ibrâya vekîli olup vekâleti hasm-ı câhidât muvâcehelerinde sâbıkan Yenişehir kadısı olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în Osman Efendi ve beyne’l-müderrisîn Nâzikîzâde demekle şehîr kıdvetü’l-müderrisîni’l-kirâm zübdetü’l-muhakkikīni’l-fihâm Mustafa Efendi ve umdetü’l-müderrisîn usvetü’l-müdakkikīn Abdurrahman Efendi şehâdetleri ile şer‘an vekâleti sâbite olan Hasan Çelebi b. Mustafa meclis-i şer‘-i hatîrde mahmiye-i mezbûrede Alaman cemâ‘atinden Haçam Perez ile mahmiye-i mezbûrede Sinyora cemâ‘atinden Menteş v. Mihail nâm yahudiler muvâcehelerinde bi’l-vekâle ikrâr ve i‘tirâf edip mezkûr Haçam Perez zimmetinde cihet-i karz-ı şer‘îden sivilye ta‘bîr olunur iki bin yüz kıt‘a riyâlî kebîr guruş hakkım olup meblağ-ı mezbûra mezkûr Menteş emr u kabûlü hâviye kefâlete kefîl olmuşdu hâlâ sivilye hesâbı üzre iki bin yüz kıt‘a riyâlî guruşa vekâlet-i mahkiyyem hasebiyle mezbûr Haçam Perez ile kefîl olan Menteş yedlerinden alıp kabz eyledim ve târih-i kitâba gelince mezbûr ile beynlerinde cereyân eden bey‘ ve şirâ ve karz-ı vedî‘at ve şirket ve sâir hukūk-ı ma‘lûme ve mechûle da‘vâlarından mezbûrân Haçam Perez ile Menteş’i ibrâ-i âmm-ı kātı‘ü’n li’n-nizâ‘la ibrâ ve iskāt edip eğer husûs-ı mezbûra müte‘allika müvekkil-i mezbûr Mehmed Efendi yedinde temessük zuhûr ve sudûr ederse amel olunmaya dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Es-Seyyid Abbas Efendi [b.] es-Seyyid Mustafa, Şükrullah b. Mustafa, Abdi Çelebi b. Hüseyin, Hüseyin b. Ebûbekir ve gayruhüm.