İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 730 Hüküm no: 982 Orijinal metin no: [96a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Mehmed’in ayrıldığı nişanlısı Ezmerağda bt. Tayan’da alacağının olduğunu ispatlayamadığı Eyâlet-i Trabzon’da Rize nâm kasaba sükkânından Ramazan b. Mehmed nâm kimesne Dîvân-ı sa‘âdet-makrûnda ma‘kūd mahfil-i kazâda, kasaba-i mezbûre sâkinelerinden Ezmerağda bt. Tayan nâm nasrâniyye muvâcehesinde üzerine takrîr-i da‘vâ edip mukaddemâ mezkûre Ezmerağda’yı istinkâh ve nâmzed etmekle mezkûreye nişân için otuz altın ile ağırlık nâmına on bin fıddî râyic fi’l-vakt akçe def‘ ve teslîm ol dahi ahz u kabz etmiş idi hâlâ mezkûre Ezmerağda fâriğ olup kat‘-ı alâka eylediği ecilden makbûzu olan meblağ-ı mezbûr otuz altın ile on bin akçeyi geri bana red ve teslîme mezkûre Ezmerağda’ya tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda dört beş def‘a dîvânda ityân-ı beyyine için istimhâl ve her kerrede mehl-i şer‘î ile imhâl olunup ityân-ı beyyineden izhâr-ı acz edip mezkûre Ezmerağda’ya yemîn dahi vermemeğin, mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilevvel li sene erba‘a ve seb‘în ve elf. Şuhûdü’l-hâl: Mustafa b. İsâ, Nasûh Beşe Çukadar, Ali Ağa b. ( ), Abdülkerim Ağa b. Bâkī ve gayruhüm.