İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 730 Hüküm no: 983 Orijinal metin no: [96b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Reis Mehmed Çelebi vakfı mütevellîsi Mehmed Efendi b. Ramazan’ın eski mütevellî Mahmud b. Ramazan’ın vakfa borcunun olduğunu ispatlayamadığı Mahmiye-i İstanbul’da Kabakulak mahallesi sükkânından Reis Mehmed Çelebi vakfına mütevellî olan Mehmed Efendi b. Ramazan meclis-i şer‘de vakf-ı mezbûra mütevellî iken vefât eden Mahmud b. Ramazan nâm kimesnenin zevce-i metrûkesi Fâtıma Hâtun bt. el-Hâc Abdülkādir mahzarında üzerine da‘vâ ve takrîr-i kelâm edip mezbûr Mahmud asl-ı mâl-ı vakıfdan makbûzu olan altı yüz otuz guruşu mücehhelen fevt olmağla terekesinden verilmek lâzım gelip hâlâ tereke-i vâfiyyesine vaz‘-ı yed eden mezbûre Fâtıma Hâtun’dan taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müteveffâ-yı mezbûrun terekesine ve rihân-ı vakf-ı mezbûrdan bir şeye vaz‘-ı yed etmediğine yemîn teklîf olundukda ol dahi alâ vefki’l-mes’ûl mezbûre Fâtıma’ya yemîn billâhi te‘âlâ edicek mûcebince müdde‘î-i mezbûr bî-vech mu‘ârazadan men‘ birle mâ vaka‘a bi’t-taleb ketb olundu. Hurrire fi’l-yevmi’l-hâmis ve’l-ışrîn min şehri Rebî‘ilevvel li sene erba‘a ve seb‘în ve elf. Şuhûdü’l-hâl: El-Hâc Mahmud b. Ahmed, Abdi Çelebi b. Hüseyin, Şükrullah Bey b. Mustafa, Muharrem Çelebi b. Abdullah ve gayruhüm mine’l-huzzâr.