İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 731 Hüküm no: 984 Orijinal metin no: [96b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yano v. Yorgi’nin sürücü tâifesinden Anastas v. Erim’de olan alacağını vârisi olan Zafiri bt. Yani’nin aldığı Fi’l-asl vilâyet-i Rumeli’nde Tırnova kazâsına tâbi‘ Reharice nâm karyeden olup mahmiye-i İstanbul’da Ali Paşa-yı Atîk mahallesinde sâkin tüccâr tâifesinden iken bundan akdem hâlik olan Yano v. Yorgi nâm zimmînin vâlidesi ve hasren vârisesi Zafiri bt. Yani nâm nasrâniyye meclis-i şer‘-i hatîr-i lâzımü’t-tevkīrde sürücü tâifesinden Anastas v. Erim nâm zimmî muvâcehesinde ikrâr ve takrîr-i kelâm edip oğlum hâlik-i mezbûr Yano’nun mezbûr Anastas zimmetinde udûl beynlerinde ma‘lûm samur semeninden üç bin yüz elli riyâlî guruş hakkı olup kable’l-ahz oğlum mezbûr Yano hâlik olmağın bi hasebi’l-irsi’ş-şer‘î meblağ-ı merkūm bana intikāl etmekle hâlâ meblağ-ı mezbûr üç bin yüz elli riyâlî guruşu mesfûr Anastas yedinden bi’t-tamâm ahz u kabz eyledim ba‘de’l-yevm meblağ-ı mezbûrdan merkūm Anastas zimmetinde bir akçe ve bir habbe hakkım bâkī kalmadı dedikde gıbbe’t-tasdîk merkūme Zafiri meclis-i şer‘de Mavridi v. Kanilo nâm zimmî muvâcehesinde takrîr-i kelâm edip oğlum hâlik-i mezbûr Yano merkūm Mavridi ile hâl-i hayâtında nice ahz [u] i‘tâ ve mu‘âmelât-ı şettâ etmekle bundan akdem mezbûr Mavridi’den oğlumun terekesine müte‘allika ba‘zı eşyâsını ahz u kabz eylemişdik deyû da‘vâ etmiş idim hâlâ merkūm Mavridi’nin dahi zimmetini ibrâ-i âmm-ı kātı‘ü’n li’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fî târihi’l-mezbûr. Şuhûdü’l-hâl: Mehmed Çavuş b. Abdullah, Ahmed Çelebi b. Mahmud, Mehmed Beşe b. Abdullah, Hasan Beşe b. Abdullah, Abdi Çelebi b. Hüseyin ve gayruhüm.