İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 731 Hüküm no: 985 Orijinal metin no: [96b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Maksud’un ortak oldukları evdeki yarım hissesini kardeşi Siyami Beşe’ye sattığı Mahmiye-i İstanbul’da Debbâğ Yunus mahallesinde sâkin Mahmud b. Maksud meclis-i şer‘-i hatîrde li ebeveyn er karındaşı işbu râfi‘ü’l-kitâb Siyami Beşe mahzarında ikrâr ve i‘tirâf edip mahalle-i mezbûrede vâki‘ bir tarafı Medîne-i Münevvere vakfına ve bir tarafı Emine Hâtun menziline ve bir tarafı Murad Reis menziline ve bir tarafı tarîk-i âma müntehî fevkānî bir oda ve tahtânî bir sofa ve havlu ve kenîfi hâvî mülk menzilin nısf-ı şâyi‘i benim ve nısf-ı şâyi‘-i âharı karındaşım mezkûr Siyami Beşe’nin mülkü olup bu âna değin müşâ‘an mutasarrıflar idik hâlâ menzil-i mezbûrda olan nısf-ı şâyi‘ hissemi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık karındaşım mezbûr Siyami Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile on sekiz bin fıddî râyic fi’l-vakt akçeye bey‘ ve teslîm edip ol dahi iştirâ ve tesellüm ve kabûl ve kabz eyledikden sonra semeni olan meblağ-ı mezbûru karındaşım Siyami Beşe’ye cihet-i karz-ı deyn-i şer‘îden deynim olan on sekiz bin akçeye takās edip ol dahi mukāssa ve kabûl eyledikden sonra hisse-i mezbûreden ve semeninden vechen mine’l-vücûh ve sebebin mine’l-esbâb hak ve alâkam kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’r-râbi‘ [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Abdullah Efendi b. Mehmed el-İmâm, İbrahim Halîfe b. Abdullah el-Müezzin, kutucu Hüseyin Çelebi, el-Hâc Yusuf b. el-Hâc ( ), Hasan Efendi b. Burhan ve gayruhüm.