İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 732 Hüküm no: 986 Orijinal metin no: [96b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Ahmed’in eski mütevellî İsmail Çelebi b. Murad’da kalan vakfa ait para ve evrakları teslim aldığı Mahmiye-i Galata a‘mâlinden kasaba-i Beşiktaş’da vâki‘ merhûm Hasan Bey nâm sâhibü’l-hayrın nukūd-ı mevkūfesine hâlâ mütevellî olan Ali Çelebi b. Ahmed meclis-i şer‘-i hatîrde vakf-ı mezbûra sâbıkan mütevellî olan İsmail Çelebi b. Murad’ın vâlidesi ve tarafından husûs-ı âti’l-beyâna vekîli olup bimâ hüve nehcü’s-sübût şer‘an vekâleti sâbite olan hâfızatü hâzihi’l-vesîka Fâtıma Hâtun bt. Halil mahzarında bi’t-tevliyye ikrâr ve i‘tirâf edip cümle asl-ı mâl-ı vakf dört bin kıt‘a riyâlî guruş olup yedi yüz riyâlî guruşu der-kîse mevcûd ve mâ‘adâ olan üç bin üç yüz guruş zimem-i nâsda merbûh olmağla der-kîse mevcûd olan yedi yüz riyâlî guruşu vekîl-i mezbûre Fâtıma Hâtun bana def‘ ve teslîm ben dahi tevliyyetim hasebiyle ahz u kabz edip mümzâ ve mahtûm ve ma‘mûlün-bih defter-i muhâsebe nâtık olduğu üç bin üç yüz riyâlî guruşu yerli yerinden bana gösterip ve rihân ve temessükâtı teslîm edip ben dahi kabûl ve rihânı kabz eyledim ba‘de’l-yevm asl-ı mâl-ı vakıfdan ve murâbahadan mütevellî-i sâbık üzerinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fî gurreti şehri Rebî‘ilâhir sene 1074. Şuhûdü’l-hâl: Mehmed Çelebi b. Hasan, İbrahim Efendi b. Mustafa nâzır-ı vakf-ı mezbûr, Sâlih Efendi b. Sâlih el-İmâm, Murtaza b. Mahmud ve gayruhüm.