İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 733 Hüküm no: 987 Orijinal metin no: [97a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş b. Mustafa’nın vârislerinin ev, bağ, hayvan ve eşyaları ile tarla ve çayırların tasarruf hakkını Ali Ağa b. Mustafa’ya sattıkları Husûs-ı âti’l-beyânın mahallinde tahrîri için bi’l-iltimâs kıbel-i şer‘den irsâl olunan Mevlânâ Mustafa Efendi mahmiye-i İstanbul’da Oruc Gāzi mahallinde iftihârü’l-emâcid ve’l-ekârim câmi‘ü’l-mehâmid ve’l-mekârim sâbıkan İstanbul Ağası olan Ali Ağa b. Mustafa’nın menzil-i âlîlerine varıp zeyl-i rakīmde isimleri mastûr olan müslimîn huzûrlarında akd-i meclis-i şer‘-i hatîr eyledikde sâbıkan çarşılar emîni olup mahmiye-i mezbûrede Şahsultan mahallesinde sâkin iken bundan akdem vefât eden Mehmed Çavuş b. Mustafa’nın sulbî kebîr oğulları ve bi’l-inhisâr vârisleri olan Abdurrahman Çelebi ile cüssesinin bülûğa tahammülü olup on dört yaşına bâliğ olup velâdetine vukūfları olan Dellâl Mehmed Bey ve İbrahim Çelebi ve Hasan Beşe ve Osman Beşe nâm kimesneler bülûğ ve rüşdünü ihbâr edip rüşd ve bülûğuna mu‘terif olan Mustafa Çelebi meclis-i ma‘kūd-ı mezbûrda, işbu kitâb sâhibi olan mûmâ-ileyh Ali Ağa mahzarında her biri tav‘an ikrâr ve i‘tirâf edip Havâss-ı Aliyye müzâfâtından Büyük Çekmece nâhiyesine tâbi‘ Taşağılı nâm karyede vâki‘ Şeyh çiftliği demekle ma‘rûf ınde’l-ahâlî ve’l-cîrân ma‘lûmu’l-hudûd olup büyût-ı adîdeyi müştemil çiftlik ta‘bîr olunur mülk menzil ve yine menzil-i mezbûra muttasıl lede’l-ahâlî ve’l-cîrân ma‘lûmu’l-hudûd iki dönüm bir kıt‘a mülk bağ ve yine menzil-i mezbûr içinde mevcûd olan yedi kara sığır ve bir çift manda sığır ve iki inek ve iki dana ve dört aded [müd] buğday ve altı müd alef ve on keyl arpa ve otuz keyl kaplıca ve on beş keyl fiğ ve beş keyl burçak ve bir büyük saban demiri ma‘a cerşine ve iki küçük saban ve dört küçük saban demiri ve dört çeyger ve üç büyük burgu ve üç küçük burgu ve iki destere ve üç çapa ve iki bel ve bir iy demiri ve bir törpü ve bir çalı tırpanı ve bir demir tokmak ve bir işkı ve bir poladî keser ve bir küçük keser ve kapaklarıyla üç tencere ve bir kevgir kepçe ve iki sahan ve bir sini ve bir tava ve üç ağaç sini ve bir el değirmeni ve iki kürek ve iki gözer ve üç araba ve dört düğen ve sâir âlât-ı zirâ‘at-ı ma‘lûme babamız müteveffâ-yı mezkûrun ile’l-vefât mülkü ve hakkı olup ba‘de vefâtihî ikimize intikāl ve bu âna değin müşâ‘an mutasarrıflar iken hâlâ zikr olunan çiftliği ve bağı cemî‘ tevâbi‘i ve levâhıkı ve kâffe-i hukūk ve müştemilâtı ve merâfıkı ile içinde mevcûd olan eşyâyı bi safkatin vâhidetin mûmâ-ileyh Ali Ağa’ya elli altı bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm ve kabûl ve kabz eyledikden sonra yine merhûm ve mağfûrun-leh Bayezid Hân vakfından olup karye-i mezbûre sınırı dâhilinde mevâzi‘-i adîdede vâki‘ çiftlik-i mezbûra tebe‘iyyet ile tahdîd ve tavsîfden müstağnî senede vakf-ı mezbûra bin akçe mukāta‘a-i kadîmesi olup tahmînen doksan müd tohum istî‘âb eder tarlalar ve beş kıt‘a çayırlar babamız müteveffâ-yı mezkûrun ile’l-vefât taht-ı tasarrufunda olup ba‘de vefâtihî hasebi’l-âde ikimize intikāl etmişdi hâlâ zikr olunan tarlalar ile beş kıt‘a çayırın hakk-ı tasarrufunu ma‘rifet-i mütevellî-i vakf-ı mezbûr ile otuz beş bin akçe bedel mukābelesinde mezbûr Ali Ağa’ya ferâğ ve tefvîz ve teslîm edip ol dahi tefevvüz ve kabûl ve kabz eyledikden sonra semen-i mezbûr elli altı bin akçe ve bedel-i mezkûr otuz beş bin akçe ki cem‘an doksan bir bin akçeyi tamâmen mezbûr Ali Ağa yedinden ahz u kabz eyledik. Min ba‘d zikr olunan çiftlik ve tarlalar ve çayırlarda hak ve alâkamız kalmadı dediklerinde, gıbbe’t-tasdîk vâki‘ hâli Mevlânâ-yı mezbûr mahallinde tahrîr, ba‘dehû ma‘an ba‘s olunan Mehmed ile meclis-i şer‘a gelip vukū‘u üzre inhâ ve takrîr etmeğin mâ vaka‘a bi’t-taleb ketb olundu. Fî evâhiri şehri Rebî‘ilevvel li sene erba‘a ve seb‘în ve elf. Şuhûdü’l-hâl: Hüseyin Çelebi b. Kadri müezzin-i mescid-i Hoşkadem, Sefer Ağa b. Seydî Çorbacı-i Acemiyân, Mehmed b. Bayram el-münâdî, Hacı Zülfikār b. Abdullah, Mehmed Halîfe b. Ali el-Müezzin, Abdullah Çelebi b. Himmet, Yusuf Beşe b. Abdullah, Receb Halîfe b. Hüseyin Dede, Abdullah Çelebi b. Ahmed, İsmail Efendi b. Kadri, İbrahim Çelebi b. el-Yesâri, Hasan Beşe b. Mahmud, Abdülbâkī b. Abdülkerim ve gayruhüm.