İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 734 Hüküm no: 988 Orijinal metin no: [97a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hasan’ın evini Derviş Odabaşı b. Yusuf’a sattığı Mahmiye-i İstanbul’da Tercüman Yunus mahallesi sükkânından Mehmed b. Hasan nâm kimesne meclis-i şer‘-i hatîrde işbu râfi‘ü’l-kitâb Derviş Odabaşı b. Yusuf mahzarında ikrâr ve i‘tirâf edip akd-i âtî sudûruna değin mülk ve hakkım olup mahalle-i mezbûrede vâki‘ iki taraf müşterî-i mezbûr mülküne ve bir tarafı Afife Hâtun mülküne ve bir tarafı tarîk-i âma müntehî iki bâb fevkānî oda ve ahır ve kenîfi müştemil mülk menzilimi, cemî‘ hudûd ve hukūk ve müştemilâtı ile mezbûr Derviş Odabaşı’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi dört bin beş yüz akçeye bey‘ ve teslîm edip ol dahi iştirâ ve tesellüm ve kabûl ve kabz eyledikden sonra semeni olan meblağ-ı mezbûr yirmi dört bin beş yüz akçeyi mezkûr Derviş Odabaşı yedinden tamâmen ahz u kabz edip ba‘de’l-yevm menzil-i mahdûd-ı mezkûr müşterî-i mezbûrun mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ramazan Halîfe b. Siyami müezzin, Hüseyin b. Ahmed, Eyüb Odabaşı, el-Hâc Mahmud b. Ali, Mahmud [b.] Rıdvan, Musa b. Yahya, Hacı Şaban b. Musa, Ahmed Efendi el-imâm ve gayruhüm.