İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 735 Hüküm no: 989 Orijinal metin no: [97b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıkçılar yoldaşlarından Ahmed Beşe’nin Mustafa Çelebi ve Abdurrahman Çelebi b. Mehmed Çavuş’la sulh oldukları Kayıkçılar yoldaşlarından Ahmed Beşe nâm râcil tarafından zikri âtî meblağı taleb ve da‘vâ ve lede’l-iktizâ sulh ve ibrâya vekîl olup nehc-i şer‘î ve vech-i mer‘î üzre vekâleti sâbite olan Osman Beşe b. Abdullah meclis-i şer‘-i hatîrde işbu râfi‘i’l-kitâb Mustafa Çelebi ve Abdurrahman Çelebi b. Mehmed Çavuş mahzarlarında bi’l-vekâle ikrâr ve i‘tirâf edip müvekkilim mezbûr Ahmed Beşe’nin mezkûrân zimmetlerinde cihet-i karz-ı şer‘îden yirmi bin akçesi olup meblağ-ı mezbûru taleb ve da‘vâ eylediğimde ancak on dört bin akçe deynimiz vardır deyû ziyâde altı bin akçeyi inkâr etmeleriyle beynimizde münâza‘ât-ı kesîre cereyânından sonra vesâtat-ı muslihîn ile da‘vâ-yı mezkûreden mezkûrân Abdurrahman Çelebi ve Mustafa Çelebi on altı bin akçe üzerine inşâ-i akd-i sulh eylediklerinde ben dahi sulh-ı mezbûru vekâleten kabûl ve bedel-i sulh olan meblağ-ı mezbûr on altı bin akçeyi meclis-i sulhde mezkûrân yedlerinden vekâlet-i mahkiyyem hasebiyle tamâmen ahz u kabz ve mâ‘adâ da‘vâsından zimmetlerini ibrâ-i âm ile ibrâ ve iskāt eyledim min ba‘d mezbûrân kıbellerinde müvekkil-i mezbûrun bir akçe ve bir habbe hakkı bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-mezbûre. Şuhûdü’l-hâl: Hüseyin Çelebi b. Kadri, Sefer Ağa b. Seydî, Mehmed b. Bayram, el-Hâc Zülfikār b. Abdullah, Mehmed Halîfe b. Ali, Abdullah Çelebi b. Himmet ve gayruhüm.