İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 735 Hüküm no: 990 Orijinal metin no: [97b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Peykel v. Serkis’in fırınındaki bârgir ve aletlerdeki hissesini ortağı Bâli Beşe b. Mustafa’ya sattığı Dârü’l-hilâfeti’l-aliyye Kostantıniyye el-mahmiyye mahallâtından Kumkapı kurbunda Nişancı Paşa-yı Atîk mahallesinde vâki‘ ekmekçi fırınında habbâz olan Peykel v. Serkis nâm Ermeni meclis-i şer‘-i hatîrde fahrü’l-a‘yân râfi‘ü hâze’l-kitâb Bâli Beşe b. Mustafa nâm râcil mahzarında ikrâr ve i‘tirâf edip zikri âtî bey‘in sudûruna değin mülk ve hakkım olup zikr olunan fırın içinde mevcûde olan yirmi re’s bârgir ile ekmekçilere mahsûs olup beynimizde ma‘lûme âlât-ı lâzımenin nısf-ı şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile Bâli Beşe’ye üç yüz kıt‘a riyâlî kebîr guruşa bi safkatin vâhidetin bey‘ ve teslîm ol dahi iştirâ ve tesellüm ve kabz eyledikden sonra semeni olan meblağ-ı mezbûr üç yüz riyâlî guruşu mezkûr Bâli Beşe yedinden tamâmen ahz u kabz edip ba‘de’l-yevm zikr olunan bârgirler ve âlât-ı lâzımenin nısf-ı şâyi‘i mezbûr Bâli Beşe’nin mülk-i müşterâsıdır, meblağ-ı mezbûrda ve semeninde vechen mine’l-vücûh alâkam kalmadı dedikde gıbbe’t-tasdîk, mâ vaka‘a bi’t-taleb ketb olundu. Tahrîren fi’l-yevmi’t-tâsi‘ min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Umdetü’l-vâ‘izîn eş-Şeyh Abdülkerim Efendi b. el-merhûm Şeyh Veli, Ahmed Reis b. Abdullah, İbrahim Çelebi b. Ali el-Kayyım, el-Hâc Abdülvehhab Çelebi b. ( ) ve gayruhüm.