İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 736 Hüküm no: 991 Orijinal metin no: [97b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hâtun bt. Osman’ın cariyesi Firûz bt. Abdullah’ı azat ettiği Husûs-ı âti’l-beyânın mahallinde tahrîri için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Defterdâr Ahmed Çelebi mahallesinde bahçe ustası İbrahim Ağa b. Hasan’ın sâkin olduğu menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i hatîr eyledikde mersûm İbrahim Ağa’nın zevcesi olup zâtı mezbûr İbrahim Ağa ve bahçe hocası Abdullah Efendi b. İbrahim ta‘rîfleri ile mu‘arrefe olan fahrü’l-muhadderât Hatîce Hâtun bt. Osman meclis-i ma‘kūd-ı mersûmda ikrâr ve takrîr-i kelâm edip kendiye rıkkıyyetini mu‘terife olan işbu orta boylu açık kaşlı gök elâ gözlü Rusiyyetü’l-asl Firûz bt. Abdullah nâm câriye-i memlûkemi, hasbeten lillâhi te‘âlâ ve taleben li merzâti Rabbi’l-a‘lâ tahrîr ve i‘tâk ve silk-i harâir-i asliyyâta ilhâk ve idrâc eyledim ba‘de’l-yevm merkūme Firûz sâir harâir-i asliyyât gibi hürre olup üzerinde hakk-ı velâdan gayrı hakkım bâkī kalmadı dedikde vâki‘ hâli Mevlânâ-yı mezbûr mahallinde tahrîr, ba‘dehû ma‘an ba‘s olunan Mehmed b. Ramazan ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ali Bey b. Abdullah, Ali Ağa b. Receb, Abdülkādir Efendi b. ( ), Ali b. Mustafa el-Yesâri, Receb b. İsâ ve gayruhüm.