İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 737 Hüküm no: 993 Orijinal metin no: [98a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Yakub’un Veli Beşe b. Hanefi ve el-Hâc Hüseyin b. Mustafa’ya ait arsanın vakıf olduğu iddiasını ispatlayamadığı Mahmiye-i İstanbul’da Mahmud Paşa câmi‘-i şerîfi’nin imâmı olup zikri âtî da‘vâya kıbel-i şer‘den me’zûn olan Mehmed Efendi b. Yakub dîvân-ı sa‘âdet-makrûnda câi’z-zikr arsaya vâzı‘u’l-yed olan işbu râfi‘ü’l-kitâb Veli Beşe b. Hanefî ve el-Hâc Hüseyin b. Mustafa mahzarında üzerlerine da‘vâ ve takrîr-i kelâm edip zikr olunan Mahmud Paşa mahallesinde vâki‘ bir tarafdan Kapıcı Ahmed Bey mülküne ve bir tarafı Odabaşızâde Süleyman mülküne ve bir tarafı Tavuk Hân’ına ve bir tarafı tarîk-i âma müntehî arsayı, mâliki olan Meremmâtçı Ali nâm kimesne ( ) senesinde vakf ve gallesini câmi‘-i mezbûr imâmı olanlara şart ve ta‘yîn edip ben câmi‘-i mezbûrda imâm olduğum ecilden arsa-i mevkūfe-i mezbûrenin gallesini mezbûrândan taleb eylediğimde edâdan te‘allül eder suâl olunsun dedikde gıbbe’s-suâl mezbûrân cevâblarında, sâlifü’z-zikr arsa mukaddemâ dört bâb fevkānî ve iki bâb tahtânî beyti ve kameriyeyi ve bir matbahı ve mahzen ve kenîfi hâvî iken mahalle-i mezbûre sükkânından İsâ Bey b. Mustafa nâm kimesnenin ile’l-vefât mülkü ve hakkı olup ba‘de vefâtihî bi hasebi’l-irsi’ş-şer‘î zevce-i metrûkesi Mümine bt. Perviz’e ve sulbî kebîr oğlu Mehmed Çelebi’ye ve sulbiye kebîre kızı Ayşe’ye isâbet ve intikāl eyledikden sonra işbu meclis-i şer‘de kırâ’at olunan hüccet-i şer‘iyye nâtık olduğu üzre merkūmân Mehmed Çelebi ve Mümine Hâtun yirmi dört sehim i‘tibâr olunan menzil-i mezkûrda olan on yedi sehim hisse-i şâyi‘alarını bin kırk dokuz senesi Zilka‘desi’nin evâhirinde yüz yirmi bin akçe semen-i makbûza işbu Ayşe’ye bey‘ ve teslîm ol dahi ba‘de’l-iştirâ ve’t-tesellüm ve’l-kabz on yedi sehimi şirâen ve yedi sehimi irsen mülkü oldukdan sonra bundan akdem vâki‘ harîk-i kebîrde bi’l-külliye muhterik olup arsa sırfa kalmağla işbu meclis-i şer‘de kırâ’at olunan hüccet-i şer‘iyye nâtıka olduğu üzre mezbûre Ayşe dahi târih-i kitâb senesi şehr-i Rebî‘ulevveli’nin yirmi ikinci gününde zikr olunan arsa-i muhterikayı ikimize yirmi beş bin akçe semen-i makbûza bâtten bey‘ ve teslîm biz dahi ale’l-iştirâk iştirâ ve tesellüm ve kabz edip bu âna değin mülkiyyet üzre tasarruf olunagelmişdir deyip vech-i muharrer üzre vakf olduğunu her biri münkir olıcak müdde‘î-i mezbûrdan müdde‘âsını mübeyyine beyyine taleb olundukda ityân-ı beyyine için dört beş def‘a istimhâl edip her kerede mehl-i şer‘î ile ba‘de’l-imhâl ityân-ı beyyineden izhâr-ı acz edip yemîn dahi vermemeğin, mâ vaka‘a bi’t-taleb ketb olundu. Fi’l-yevmi’s-sânî [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mustafa Bey Boyacılar Kethüdâsı, Hacı Ahmed b. Mahmud, Abdülkerim Ağa Muhzırân, Abdi Çelebi b. Hüseyin, Ali b. Hasan ve gayruhüm.