İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 738 Hüküm no: 994 Orijinal metin no: [98a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aşçıbaşısı Abdullah Ağa b. Abdullah’ın, dellâl Mehmed’de olan alacağını kefili Ahmed Ağa b. Yusuf’dan aldığı Mahmiye-i İstanbul’da Saray-ı atîk-i sultânî aşçıbaşısı olan mefharü’l-a‘yân Abdullah Ağa b. Abdullah tarafından husûs-ı âti’l-beyâna vekîl olup Mustafa Beşe b. Osman ve Mehmed Çavuş b. Muslu nâm kimesneler şehâdetleriyle şer‘an vekâleti sâbite olan Ramazan Ağa b. Şaban meclis-i şer‘-i hatîrde işbu bâ‘isü’l-kitâb Ahmed Ağa b. Yusuf mahzarında bi’l-vekâle ikrâr ve takrîr-i kelâm edip müvekkilim mersûm Abdullah Ağa târih-i kitâbdan üç sene mukaddem altı yüz altı dirhemden masnû‘ bir sîm leğen ile bir sîm ibriğini bey‘ için Mehmed nâm dellâle verip ol dahi Bezzâ[zi]stân-ı atîk’de mezbûr Ahmed Ağa’nın dolabı önünde Hasan nâm kimesneye sekiz bin dört yüz seksen dört akçeye bey‘ eyledikde mezbûr Ahmed Ağa semeni olan meblağ-ı merkūma kefîl olmağla mezkûr dellâl Mehmed mütebeyyinen fevt olmağla veresesi ma‘rifetiyle merkūm Ahmed Ağa’dan meblağ-ı mezbûru müvekkilim mersûm Abdullah Ağa da‘vâ ve taleb eyledikde mezkûr Ahmed Ağa inkâr etmekle beynlerinde münâza‘ât-ı kesîre vâkı‘a olmuşdu el-hâletü hâzihî vesâtat-ı muslihîn ile mezbûr Ahmed Ağa müvekkilim merkūm Abdullah Ağa’nın da‘vâ-yı meşrûhasından dört bin beş yüz akçe üzerine inşâ-i akd-i sulh eylediklerinde ol dahi sulh-ı mezbûru kabûl ve bedel-i sulh olan meblağ-ı merkūm dört bin beş yüz akçeyi müvekkilim mezbûr Abdullah Ağa mezkûr Ahmed Ağa yedinden ahz u kabz edip mâ‘adâ üç bin dokuz yüz seksen dört akçe da‘vâsından mezbûr Ahmed Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-merkūm. Şuhûdü’l-hâl: El-Hâc Şaban b. Abdullah, Mehmed Çavuş b. Mustafa, İsmail Çelebi es-Sahhâf, es-Seyyid Cafer Çelebi es-Sahhâf, İbrahim Çelebi b. Yusuf ve gayruhüm.