İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 739 Hüküm no: 996 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hümâ Hâtun bt. İbrahim’in kocası Ali Beşe b. Nasûh’da alacağının olduğu Mahmiye-i İstanbul’da Mi‘mâr Sinan mahallesinde sâkine Hümâ Hâtun bt. İbrahim nâm hâtun mahfil-i kazâda, hâlâ zevci Ali Beşe b. Nasûh mahzarında üzerine takrîr-i da‘vâ edip târih-i kitâbdan iki sene mukaddem mezkûr Ali Beşe’ye on üç bin fıddî râyic fi’l-vakt akçe ikrâz ve teslîm ol dahi iktirâz ve kabz etmişdi hâlâ meblağ-ı mezbûru zevcim mezbûr Ali Beşe’den taleb ederim, suâl olunsun dedikde gıbbe’s-suâl mezbûr Ali Beşe cevâbında fi’l-hakīka zevcem müdde‘iyye-i mezbûreden vech-i muharrer üzre on üç bin akçe istikrâz ve kabz edip elân zimmetimde lâzımü’l-edâ ve vâcibü’l-kazâ deynimdir deyû bi’t-tav‘ ve’r-rızâ ikrâr ve i‘tirâf etmeğin alâ mûcebi i‘tirâfihî meblağ-ı mezbûru edâya mezbûr Ali Beşe’ye tenbîh olunup mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-merkūm. Şuhûdü’l-hâl: Nasûh Beşe b. ( ), el-Hâc Ahmed b. ( ), Abdi b. Hüseyin, Dede b. Mahmud ve gayruhüm.