İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 739 Hüküm no: 997 Orijinal metin no: [98b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Magır v. Mıgırdiç’in, eşi Tamam bt. Serkis’i İsmail Beşe b. Ahmed’in dövdüğü iddiasını ispatlayamadığı Mahmiye-i İstanbul’da Süleyman Ağa mahallesinde sâkine kendi tarafından asîl ve zevcesi Tamam bt. Serkis nâm nasrâniyye kıbelinden husûs-ı âtîye vekîl olup bimâ hüve nehcü’s-sübût şer‘an vekâleti sâbite olan Magır v. Mıgırdiç nâm Ermeni dîvân-ı kāimmakām-ı sadr-ı a‘zamîde ma‘kūd olan mahfil-i kazâda, işbu râfi‘ü’l-kitâb İsmail Beşe b. Ahmed mahzarında üzerine takrîr-i da‘vâ edip zevcem mezbûre Tamam firâşımdan hâmil iken mezbûr İsmail Beşe târih-i kitâbdan dört gün mukaddem bi gayri hakkın amden mezkûre Tamam’ın karnına darb edip ol darbın şiddetinden bir cenîn-i meyyit ittikā? ve iskāt etmişdir, hâlâ suâl olunup mûcebi icrâ olunmak matlûbumdur dedikde gıbbe’s-suâl ve akībe’l-inkâr mezkûr Magır’dan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ mezkûre Tamam’ın amden bi gayri hakkın karnına darb etmeyip ve ol darbın şiddetinden ittikā? ve cenîn [iskāt] etmediğine mezbûr İsmail Beşe’ye yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin bilâ-beyyine mu‘ârazadan men‘ birle mâ hüve’l-vâki‘ bi’t-taleb ketb olundu. Hurrire fî târihi’l-mezbûr li’s-seneti’l-merkūme. Şuhûdü’l-hâl: Mustafa Efendi b. Davud, Halil [b.] Musa, Ali b. Abdullah, el-Hâc Rıdvan, Hacı Hasan ve gayruhüm.