İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 740 Hüküm no: 998 Orijinal metin no: [98b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ömer Efendi b. Ebubekir’in arsasını Hacı Yusuf Beşe b. Abdullah’a sattığı
Mahmiye-i İstanbul’da Kırkçeşme kurbunda Firûz Ağa mahallesi sâkinlerinden Ömer Efendi b. Ebûbekir meclis-i şer‘-i hatîr-i lâzımü’t-tevkīrde işbu sâhibü’l-kitâb Hacı Yusuf Beşe b. Abdullah mahzarında ikrâr ve takrîr-i kelâm edip silk-i mülk-i sahîhimde münselik mahalle-i mezbûrede vâki‘ tarafeyni müşterî-i mezbûr mülkü ve bir tarafı imâma meşrût vakıf menzil ve bir tarafı tarîk-i hâs ile mahdûd Neslihan Hâtun’dan bundan akdem iştirâ eylediğim muhterik mülk menzil arsasını, nakd-i râyic fi’l-vakt yirmi bir bin akçeye bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl ve tesellüm eyledikden sonra semeni olan meblağ-ı mezbûr yirmi bir bin akçeyi tamâmen yedinden alıp kabz eyledim ba‘de’l-yevm arsa-i mezbûre merkūm Hacı Yusuf Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber, mâ vaka‘a bi’t-taleb ketb olundu. Fi’l-yevmi’s-sâmin [min] şehri Rebî‘ilâhir li sene erba‘a ve seb‘în ve elf.
Şuhûdü’l-hâl: Umdetü’l-ulemâ Ali Efendi Sâbık Belgrad Kadısı, Fahrü’l-eimme Halil Efendi b. Ali el-İmâm, Ahmed Halîfe el-Müezzin, Mustafa Beşe Keresteci, Hasan b. Abdullah, Ali Bey b. Abdullah ve gayruhüm.
|