İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 740 Hüküm no: 999 Orijinal metin no: [98b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Solakbaşı Mustafa Ağa’nın eşyalarını tehditle düşük fiyata aldığı iddiasını Mahmud Çelebi b. Ali Yesâri’nin ispatlayamadığı Mahmiye-i İstanbul’da Sofular mahallesi sâkinlerinden Mahmud Çelebi b. Ali Yesâri sâbıkan solakbaşı olan Mustafa Ağa mahzarında üzerine takrîr-i da‘vâ edip merkūm Mustafa Ağa bundan akdem solakbaşı iken zâbitim olup tehdîdini îkā‘a kādir olmağla beni tehdîd ve ikrâh edip eşyâ-i memlûkemden bir samur kaplı kadife kürk ve kadife eyeri değer-i bahâsı otuz bin akçe iken benden ikrâhen yirmi bin akçeye iştirâ etmişdir hâlâ suâl [olunup] merkūm kürk ve değeri bana redde mezbûr Mustafa Ağa’ya tenbîh olunmak murâdımdır dedikde gıbbe’s-suâl merkūm Mustafa Ağa cevâbında müdde‘î-i mezbûr, merkūm kürk ve eyeri tâyi‘an bey‘ ettiğini ikrâr ve lâkin vech-i meşrûh üzre ikrâh-ı mu‘teberi inkâr eyledikde müdde‘î-i mezbûrdan müdde‘âsını mübeyyine beyyine taleb olundukda izhâr-ı acz edip istihlâf etmeğin ol dahi alâ vefki’l-mes’ûl half billâhi te‘âlâ etmeğin mûcebince müdde‘î-i mezbûr bî-vech mu‘ârazadan men‘ birle mâ vaka‘a bi’t-taleb ketb olundu. Hurrire fi’l-yevmi’l-âşir [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ahmed Ağa Koyun Emîni, Mustafa Çelebi el-Kayyım, Emir Ahmed Çelebi Bölük, Hamza Bey ve gayruhüm.