İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 745 Hüküm no: 1006 Orijinal metin no: [99b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Abdullah’ın Osman Ağa b. Gazanfer’de alacağının vârisleri olan çocukları Ahmed ve Hüseyin’e ödenmesi Mahrûse-i Galata müzâfâtından kasaba-i Tophâne’de İlyas Çelebi mahallesi sükkânından olup diyâr-ı Habeş’de vefât eden Mehmed Ağa b. Abdullah’ın sulbî oğulları Abdullah ve Hüseyin nâm sagīrlerin kıbel-i şer‘den mansûb vasîleri Ali Bey b. Yusuf tarafından husûs-ı âtîye vekîl-i müsecceli olup bimâ hüve nehcü’s-sübût şer‘an vekâleti sâbite olan umdetü’l-a‘yân Mehmed Ağa b. Mehmed dîvân-ı kāimmakām-ı sadr-ı a‘zamîde ma‘kūd mahfil-i kazâda, mahmiye-i İstanbul’da Yenibahçe’de Arpaemini mahallesinden olup diyâr-ı Mısır’da mutavattın olan Osman Ağa b. Gazanfer tarafından husûs-ı âtîye vekîli olup vekâleti hâkim-i muvakki‘-i kitâb tûbâ-lehû ve hüsnü me’âb hazretleri huzûrunda hasm-ı şer‘î-i câhid mahzarında sâbite olan Hasan Efendi b. Mahmud mahzarında üzerine bi’l-vekâle takrîr-i da‘vâ edip müteveffâ-yı mezkûr Mehmed Ağa’nın müvekkil-i mezbûr Osman Ağa zimmetinde cihet-i karz-ı şer‘îden on bin beş yüz kıt‘a riyâlî kebîr guruş hakkı olup hattâ bin altmış üç senesi Şevvâlü’l-mükerremi’nin yirmi altıncı gününde mahmiye-i mezbûrede Ahî Çelebi mahkemesinde nâibü’ş-şer‘ olan es-Seyyid Hüseyin kıbelinden mezbûr el-Hâc Mehmed Ağa’nın mahmiye-i mezbûrede Balkapanı’nda vâki‘ hücresine bi’t-taleb vârid olan Mevlânâ Abdülkādir Efendi huzûrunda mezkûr Osman Ağa ikrâr ve i‘tirâf ve mezbûr Mehmed Ağa tasdîk etmekle Mevlânâ-yı mezbûr ba‘de’t-tahrîr ma‘an ba‘s olunan Çukadar Mehmed Beşe b. Süleyman ve Mehmed Çelebi b. Hüseyin ve Ali Bey b. Mehmed ile mûmâ-ileyh Hüseyin Efendi’ye inhâ ve takrîrden sonra mezbûr Hüseyin Efendi mezkûr el-Hâc Mehmed Ağa’ya hüccet verdikden sonra kable’l-ahz ve’l-istîfâ mezbûr Mehmed Ağa vefât etmekle meblağ-ı mezbûr sagīrân-ı mezbûrâna isâbet etmişdir deyû min külli’l-vücûh mazmûnu takrîr-i meşrûhunu nâtık ve târih-i mezbûr ile müverraha ve Mevlânâ-yı mezbûr es-Seyyid Hüseyin Efendi imzâsıyla mümzâ ve hâtemi ile mahtûme hüccet-i şer‘iyye ibrâz [100a] edip vekîl-i mezbûr Hasan Efendi muvâcehesinde feth ve kırâ’at ve istintâk olundukda mazmûn-ı hücceti bi’l-külliye inkâr etmeğin vekîl-i mezbûr Mehmed Ağa’dan mazmûn-ı hücceti mübeyyine beyyine taleb olundukda udûl-ı müslimînden olup zeyl-i hüccet-i mesfûrede isimleri muharrer olan müslimînden sâbıkan Habeş Beylerbeyisi olan umdetü’l-ümerâ’i’l-kirâm zübdetü’l-fukarâi’l-fihâm Mustafa Paşa b. Hasan ve Mustafa b. Haydar ve İbrahim b. Zülfikār nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ işbu vekîl Hasan Efendi’nin müvekkili Osman Ağa b. Gazanfer târih-i mezbûrda zikr olunan hücr[e]de nâib-i mûmâ-ileyh Hüseyin Efendi kıbelinden bi’t-taleb vârid olan Abdülkādir Efendi huzûrunda mezbûr Mehmed Ağa’ya cihet-i karz-ı şer‘îden on bin beş yüz altmış kıt‘a riyâlî guruş deynim vardır deyû huzûrumuzda ikrâr ve i‘tirâf ve mezbûr el-Hâc Mehmed Ağa tasdîk etmekle Mevlânâ-yı mezbûr ba‘de’t-tahrîr nâib-i mûmâ-ileyh Hüseyin Efendi’ye inhâ edip işbu hücceti mezbûr el-Hâc Mehmed Ağa’ya vermişdir, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde bada’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilevvel li sene erba‘a ve seb‘în ve elf. Şuhûdü’l-hâl: Abdülkerim Ağa muhzırân, el-Hâc Ahmed b. Mahmud, Abdi Çelebi b. Hüseyin, Mustafa Çelebi b. İsâ ve gayruhüm.