İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 747 Hüküm no: 1007 Orijinal metin no: [100a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey’in Mehmed b. Yunus’un kiracı olduğu evin mescidin müezzinine şart kılınmış olduğunu ispatlayamadığı Mahmiye-i İstanbul’da Tahtakale kurbunda Hacı Timur mahallesi mescid-i şerîfinde müezzin olan Kapıcı Hüseyin Bey meclis-i şer‘de zikri âtî menzile icâre-i mu‘accele ve müeccele ile vâzı‘u’l-yed olan işbu sâhibü’l-kitâb Mehmed b. Yunus mahzarında üzerine takrîr-i da‘vâ edip zikr olunan Hacı Timur mahallesinde vâki‘ bir tarafı Şeyh Mehmed Efendi mülküne ve bir tarafı Kadri Çavuş mülküne ve bir tarafı mahalle-i mezbûre imâmına meşrût menzile ve bir tarafı tarîk-i âma müntehî menzilin mâlikesi olan merhûme Şahana nâm hâtun menzil-i mezbûrun süknâsını câmi‘-i mezbûrda müezzin olanlara şart ve ta‘yîn edip hâlâ ben câmi‘-i mezbûrda müezzin olduğum ecilden menzil-i mevkūf-ı mezbûrdan kasr-ı yed edip ber mûceb-i şart-ı vâkıfe sâkin olmak için bana teslîme mezbûr Mehmed’e tenbîh olunmak matlûbumdur dedikde gıbbe’s-suâl mezbûr Mehmed cevâbında fi’l-vâki‘ menzil-i mezbûrun mâlikesi mezbûre Şahana Hâtun vakf ve gallesini mahalle-i mezbûrede müezzinlere şart eylediği ecilden vakf-ı mezbûra mütevellî olan İbrahim nâm kimesne menzil-i mevkūf-ı mezbûru icâre-i mu‘accele-i ma‘lûme ve beher mâh on beşer akçe ücret-i müeccele ile bana îcâr ve teslîm ben dahi istîcâr ve kabûl ve kabz eyledikden sonra yedime işbu meclis-i şer‘de kırâ’at olunan temessükü vermişdir, ol vechile vaz‘-ı yed ederim deyip süknâsı meşrûta idiğini inkâr edicek müdde‘î-i mezbûr müezzin Kapıcı Hüseyin’den menzil-i merkūmun süknâsı meşrût idiğine beyyine taleb olundukda ityân-ı beyyineye kādir olmamağla bî-vech mu‘ârazadan men‘ birle mâ vaka‘a bi’t-taleb ketb olundu. Şuhûdü’l-hâl: Mehmed Efendi el-İmâm, Abdi Çelebi b. Hüseyin, Abdal Mehmed b. ( ), Hüseyin b. Ali ve gayruhüm.