İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 747 Hüküm no: 1008 Orijinal metin no: [100a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Frenk papucu diken esnafın Lonca Yeri denilen yerde papuç diken Dimitri v. Nikola ile alakalarının kalmadığı Mahrûse-i Galata’da Balık Pazarı’nda Frenk papucu diken tâifesinden Corco v. Cuvan ve Andriye v. Yorgi ve Mihal v. Nikola ve Kostantin v. Manol ve Yani v. Mikel ve Yani v. Yorgi ve Andriye v. Franko nâm zimmîler meclis-i şer‘-i hatîrde tâife-i mezbûreden olup Lonca Yeri demekle ma‘rûf mevzi‘de papuç diken Dimitri v. Nikola nâm zimmî mahzarında her biri takrîr-i kelâm edip mezbûr Dimitri bed-lisân olmağla her biri mezbûrun akvâl ve ef‘âlinden müte’ezzî ve mutazaccirler olduğu ecilden mevzi‘-i mezkûrdan kalkıp âhar mevzi‘e nakl etmek için mezbûr Dimitri üzerine da‘vâ eylediğimizde, mezkûr Dimitri ba‘de’l-yevm tâifemize karışmayıp mevzi‘-i mezkûrdan kalkıp âhar yere nakl etmeğe râzı olmağla mezkûr Dimitri ile vechen mine’l-vücûh ve sebebin mine’l-esbâb alâka ve medhalimiz yoktur dediklerinde, mezkûr Dimitri ben dahi rızâm ile mevzi‘-i mezbûrdan kalkıp âhar yere nakl etmeğe ta‘ahhüd eyledim ba‘de’l-yevm mezkûrun ile vechen mine’l-vücûh ve sebebin mine’l-esbâb alâka ve medhalim yoktur dedikde gıbbe’t-tesâdukı’ş-şer‘î mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-mezbûr. Şuhûdü’l-hâl: El-Hâc Ahmed b. Mahmud, Abdi Çelebi b. Hüseyin, Resûl b. Rıdvan, Mehmed b. Ramazan ve gayruhüm.