İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 752 Hüküm no: 1014 Orijinal metin no: [101a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Abbas Ağa’nın hizmetkârı Mehmed b. Mustafa aleyhine açtığı alacak davasından vazgeçtiği Mahmiye-i İstanbul’da Molla Gürânî mahallesinde sâkin umdetü’l-a‘yân zübdetü’l-erkân Ahmed Ağa b. Abbas Ağa dîvân-ı sa‘âdet-makrûnda ma‘kūd olan meclis-i şer‘-i hatîrde sâbıkan hizmetkârı olan işbu râfi‘ü’l-kitâb Mehmed b. Mustafa mahzarında ikrâr ve i‘tirâf edip mukaddemâ mezbûr Mehmed hazînedârım iken târih-i kitâb senesi şehr-i Rebî‘ulevveli’nin yirmi ikinci gününde eşyâ-i memlûkemden bir çift elmas bilezik ve bir mâ’i top hâre ve bir sîm sînebend ve dokuz bin akçemi hafiyyeten ahz u kabz ve firâr ve gaybet etmiş idi hâlâ mezkûr Mehmed’e zafer bulup taleb ve da‘vâ eylediğimde inkâr etmekle beynimizde münâza‘ât ve muhâsamât-ı şedîde vukū‘undan sonra da‘vâ-yı meşrûhamdan mezkûr Mehmed’i ibrâ-i âm ile ibrâ edip ba‘de’l-yevm husûs-ı mezbûra müte‘allika vechen mine’l-vücûh ve sebebin mine’l-esbâb mezbûr kıbelinden benim için hak ve alâka kalmadı dedikde gıbbe’t-tasdîk, mâ vaka‘a bi’t-taleb ketb olundu. Hurrire fi’l-yevmi’l-âşir [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mehmed Efendi b. Mustafa, Mehmed Efendi b. Ahmed, Abdullah Efendi b. Mehmed, Ali Çelebi b. Osman ve gayruhüm.