İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 752 Hüküm no: 1015 Orijinal metin no: [101a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Neslihan bt. Mustafa’nın Pîr Mehmed Paşa evkafına ait iki odayı Mahmud Çelebi b. Osman’a devrettiği Mahmiye-i İstanbul’da Balaban Ağa mahallesi sâkinelerinden Neslihan bt. Mustafa nâm hâtun meclis-i şer‘-i hatîrde işbu bâ‘isü’l-kitâb Mahmud Çelebi b. Osman mahzarında ikrâr ve takrîr-i kelâm edip mahalle-i mezbûrede vâki‘ merhûm Pîr Mehmed Paşa’nın evkāfından olup müte’ehhilîn odalarında icâre-i mu‘accele ve beher şehr kırk akçe ücret-i müeccele ile lede’l-ahâlî ve’l-cîrân ma‘lûmu’l-hudûd taht-ı tasarrufumda olan iki bâb fevkānî ve tahtânî odalarının hakk-ı tasarrufunu, ma‘rifet-i mütevellî-i vakf-ı mezbûr ile mezkûr Mahmud Çelebi’ye üç bin akçe bedel mukābelesinde ferâğ ve tefvîz, ol dahi vech-i muharrer üzre tefevvüz ve kabûl eyledikden sonra bedel-i merkūm üç bin akçeyi mersûm Mahmud Çelebi yedinden tamâmen ahz u kabz eyledim ba‘de’l-yevm zikr olunan odalar mersûm Mehmed [Mahmud] Çelebi’nin hakk-ı makbûzudur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mustafa b. Mehmed, Kadem b. Hüseyin, Süleyman b. Ali, Ali Çavuş b. Abdullah.