İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 753 Hüküm no: 1016 Orijinal metin no: [101b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîrî Halife b. Hasan’ın ölmeden önce Mahmud Çelebi’ye olan borcunu ödediğine şahitlik edildiği Mahmiye-i İstanbul’da Şeyh Ebülvefâ mahallesinde sâkin işbu râfi‘ü’l-kitâb Mahmud Çelebi b. Mustafa meclis-i şer‘-i hatîrde dergâh-ı âlî yeniçerileri halîfelerinden olup mahmiye-i mezbûrede Topkapısı kurbunda sâkin iken bundan akdem vefât eden Pîrî Halîfe b. Hasan’ın verâseti, sulbiye kebîre kızı umdetü’l-muhadderât zübdetü’l-muvakkarât Bigümân nâm hâtuna ve li ebeveyn karındaşları umdetü’l-e‘âzım ve’l-e‘âlî zübdetü’l-mekârim ve’l-me‘âlî Mahmud Ağa ve Ahmed Ağa’ya münhasıra olduğu şer‘an mütehakkik olmağla mezkûrân Mahmud Ağa ve Ahmed Ağa tarafından husûmet ve redd-i cevâba vekîl olup vekâleti Himmet Beşe b. Yusuf ve Mustafa Çelebi b. Abdurrahman nâm kimesneler şehâdetleri ile şer‘an sâbite olan mezkûre Bigümân Hâtun’un zevci iftihârü’l-emâcid ve’l-ekârim Durmuş Ağa b. Mehmed mahzarında üzerine takrîr ve da‘vâ edip bu husûsun husûlü için müteveffâ-yı mezbûr hayâtında vefâtından altı ay mukaddem kırk kıt‘a riyâlî guruş ve on beş gün mukaddem beş bin akçe def‘ ve teslîm ol dahi ahz u kabz edip husûs-ı mezbûrun husûlü müyesser olmazdan mukaddem vefât etmekle meblağ-ı mezbûru tereke-i vâfiyyesinden bana edâya tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyin beyyine taleb olundukda udûl-i müslimînden olup Sîmkeş mahallesinde Himmet Beşe b. Yusuf ve Molla Gürânî mahallesinde Mustafa Çelebi b. Abdurrahman nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müdde‘î-i mezbûr Mahmud Çelebi bu husûsun husûlü için an tarîki’r-rüşvet bizim huzûrumuzda bir def‘a kırk kıt‘a riyâlî guruş ve bir def‘a beş bin akçe müteveffâ-yı mezbûr Pîrî Halîfe’den hayâtında def‘ ve teslîm ol dahi ahz u kabz eyledi deyû biz husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ vaka‘a bi’t-taleb ketb olundu. Hurrire fi’l-yevmi’l-âşir şehri Rebî‘ilâhir li sene erba‘a ve seb‘în ve elf. Şuhûdü’l-hâl: Es-Seyyid Abdülhâlik b. es-Seyyid Cemal, Ali Beşe b. Mehmed, Mahmud Çelebi b. İsmail, Hacı Ahmed b. Mahmud, Mustafa b. Ali.