İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 754 Hüküm no: 1017 Orijinal metin no: [101b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîrî Halife b. Hasan’ın ölmeden önce Mustafa Efendi’ye verilmek üzre emanet ettiği paranın yerine ulaştığı Dergâh-ı âlî yeniçerilerinin yirmi birinci cemâ‘atinin odabaşısı işbu râfi‘ü’l-kitâb Ali Beşe b. Mehmed meclis-i şer‘ hatîrde dergâh-ı âlî yeniçerileri halîfelerinden olup mahmiye-i mezbûrede Topkapısı kurbunda sâkin iken bundan akdem vefât eden Pîrî Halîfe b. Hasan’ın verâseti, sulbiye kebîre kızı umdetü’l-muhadderât zübdetü’l-muvakkarât Bigümân nâm hâtuna ve li ebeveyn karındaşları umdetü’l-e‘âzım ve’l-e‘âlî zübdetü’l-mekârim ve’l-me‘âlî Mahmud Ağa ve Ahmed Ağa tarafından husûmet ve redd-i cevâba vekîli olup vekâleti Himmet Beşe b. Yusuf ve Mustafa Çelebi b. Abdurrahman nâm kimesneler şehâdetleri ile şer‘an sâbite olan mezkûr Bigümân Hâtun’un zevci iftihârü’l-emâcid ve’l-ekârim Durmuş Ağa b. Mehmed mahzarında üzerine takrîr ve da‘vâ edip müteveffâ-yı mezbûr hayâtında kethüdâ yeri kâtibi Mustafa Efendi’ye îsâl için alâ tarîki’l-emâne iki bin akçe def‘ ve teslîm ol dahi ahz u kabz edip mezbûr Mustafa Efendi’ye vermeyip mücehhelen vefât etmekle meblağ-ı mezbûr tereke-i vâfiyyesinden bana edâya tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup Sîmkeş mahallesinden Himmet Beşe b. Yusuf ve Molla Gürânî mahallesinden Mustafa Çelebi b. Abdurrahman meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Ali Beşe mezkûr Mustafa Efendi’ye îsâl için huzûrumuzda müteveffât-ı mezbûr hayâtında iki bin akçe def‘ ve teslîm ol dahi ahz u kabz edip mücehhelen vefât eyledi. Bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın gıbbe’t-tasdîki’ş-şer‘î mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’l-âşir şehri Rebî‘ilâhir li sene erba‘a ve seb‘în ve elf. Şuhûd[ü’l-hâl]: Es-Sâbikūn.