İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 755 Hüküm no: 1018 Orijinal metin no: [101b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasımağa mahallesinden Şerife Hâtun’un Ali Beşe’den muhâlaa yoluyla boşandığı Mahmiye-i İstanbul’da Kasım Ağa mahallesinde sâkine Şerife bt. Ahmed nâm hâtun meclis-i şer‘-i şerîfde zevci Ali Beşe b. Abdülgani mahzarında üzerine da‘vâ ve takrîr-i kelâm edip zevcim mezbûr Ali Beş zimmetinde mütekarrir ve ma‘kūd-ı aleyh olan beş bin akçe mehr-i müeccelim iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Ali Beşe ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ve zevciyyete ve gayra müte‘allika âmme-i de‘âvîden her birimiz âharı ibrâ-i âm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’r-râbi‘ şehr Rebî‘ilâhir li sene erba‘a ve seb‘în ve elf. Şuhûdü’l-hâl: İbrahim Efendi b. Mahmud, Mehmed er-Râcil, Receb Çelebi b. Nasûh, Mehmed Beşe b. Osman.