İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 758 Hüküm no: 1024 Orijinal metin no: [102b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Cano ve ortağı Zibro’nun Süleyman Paşa’ya borçları olduğunu kabul ettikleri Husûs-ı âti’l-beyânın mahallinde tahrîri iltimâs olunmağın kıbel-i şer‘den Mevlânâ Mehmed Efendi irsâl olunup ol dahi hâlâ Trabluşşam Beylerbeyisi olan emîrü’l-ümerâ’i’l-kirâm Süleyman Paşa hazretlerinin Sarıgez’de vâki‘ menziline varıp zeyl-i rakīmde esâmîsi mastûr olan müslimîn huzûrlarında akd-i meclis-i şer‘-i hatîr eyledikde meydan kasaplarından Can oğlu demekle ma‘rûf Dimitri v. Cano ve şerîki Zibro v. Yani nâm zimmîler meclis-i ma‘kūd-ı mezbûrda, mûmâ-ileyh Süleyman Paşa’nın tarafından husûs-ı âtîye vekîl olup vekâleti Hüseyin b. Ali ve Mustafa b. Abdullah nâm kimesneler şehâdetleriyle şer‘an vekâleti sâbite olan umdetü erbâbi’t-tahrîr ve’l-kalem Abdullah Efendi b. Abdurrahman mahzarında her biri ikrâr ve i‘tirâf edip müvekkil-i mûmâ-ileyh Süleyman Paşa’ya târih-i kitâbdan yüz seksen gün mukaddem sene tamâmına müeccel cihet-i deyn-i şer‘îden altı yük akçe ale’l-iştirâk deynimiz olduğundan gayrı mûmâ-ileyh Süleyman Paşa’nın Sultan Mehmed Hân câmi‘-i şerîfi kurbunda vâki‘ ma‘lûmü’l-hudûd selhhânesi beher sene yüz on beş bin akçe ücretle taht-ı icâremizde olup beher sene icâresi olan meblağ-ı mezbûr yüz on beş bin akçeyi edâ ve teslîm edip bu senenin dahi icâresi tamân münkaziye olmağa yüz yetmiş beş gün kalmışdır, ol vechile ba‘de inkızâil-müdde ücret-i mezkûre yüz on beş bin akçe müvekkil-i mûmâ-ileyh Süleyman Paşa’ya zimmetimizde vâcibü’l-edâ ve lâzımü’l-kazâ deynimizdir dediklerinde, gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Halil b. Davud ile meclis-i şer‘-i hatîre gelip alâ vukū‘ihi inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer şehri Rebî‘ilâhir li sene erba‘a ve seb‘în ve elf. Şuhûdü’l-hâl: El-Hâc Osman Ağa b. Kasım, el-Hâc Mustafa b. Durmuş, el-Hâc Abdülkādir b. Mustafa, el-Hâc Mahmud b. Ali, el-Hâc b. ( ) çuhadâr, el-Hâc Hasan Ağa b. Receb ve gayruhüm.