İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 759 Hüküm no: 1025 Orijinal metin no: [102b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anastas’ın hayatta iken samur parasından dolayı olan borcunu Panayot’a ödediği Vilâyet-i Rumeli’nde Tırnova kazâsı müzâfâtından Rahova nâm karye sâkinelerinden Zafire bt. Yani nâm nasrâniyye meclis-i şer‘-i hatîr-i lâzımü’t-tevkīrde celeb tâifesinden Anastas v. Adam nâm zimmî mahzarında üzerine takrîr-i da‘vâ edip tüccâr tâifesinden olup bundan akdem hâlik olan sadrî oğlum Panayot v. Görgi nâm zimmînin mezbûr Anastas zimmetinde samur bahâsından üç bin yüz elli esedî guruş hakkı olup hâlik-i mezbûrun verâseti bana münhasıra olmağla bi hasebi’l-irsi’ş-şer‘î meblağ-ı merkūm bana intikāl etmeğin taleb ederim suâl olunsun dedikde gıbbe’s-suâl merkūm Anastas cevâbında fi’l-vâki‘ hâlik-i mezbûr samur bahâsından on bin yüz elli esedî guruş deynim var idi ve lâkin iki bin elli esedî guruşunu hâl-i sıhhatinde merkūm Panayot’a teslîm edip helâkinden sonra dahi Manolaki nâm zimmîye beş yüz esedî guruş ve Kudüs-i şerîf patriği Kantaryos nâm râhibe iki yüz esedî guruş deyni olmağla vâlidesi merkūme Zafire’nin emriyle beş yüz esedî guruş Manolaki’ye ve iki yüz esedî guruş Kantaryos’a verdiğimden sonra dört yüz esedî guruş dahi mezbûre Zafire’nin kendiye def‘ ve teslîm edip zimmetimde bir akçe hakkı bâkī kalmamışdır deyû def‘le mukābele edicek merkūme Zafire vech-i muharrer üzre kendi emriyle merkūmân Manolaki’ye beş yüz esedî ve Kantoryas’a iki yüz esedî guruş verip ve kendiye dahi dört yüz esedî guruş def‘ ve teslîm eylediğini ikrâr edip ve lâkin hâlik-i mezbûrun hayâtında iki bin elli esedî guruş [teslîm] ettiği ma‘lûmum değildir dedikde merkūm Anastas’dan hâlik-i merkūm Panayot’a hâl-i hayâtında meblağ-ı merkūm üç bin yüz elli esedî guruşdan iki bin elli guruşunu def‘ ve teslîm eylediğini mübeyyine beyyine taleb olundukda udûl-i ricâlden mahmiye-i İstanbul’da Ali Paşa-yı Atîk mahallesi sükkânından olup kürkçü tâifesinden olan Didin v. Serandi ve Kiro v. Anastas nâm zimmîler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ merkūm Panayot’a hâl-i hayâtında samur bahâsından vech-i muharrer üzre iki bin elli guruşunu mezbûr Anastas bizim huzûrumuzda def‘ ve teslîm edip bizi işhâd eylemiş idi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mezbûre Zafire bî-vech mu‘ârazadan men‘ birle mâ vaka‘a bi’t-taleb ketb olundu. Hurrire fi’l-yevmi’r-râbi‘ aşer şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mustafa b. Ali, Mahmud Ağa b. Hasan, Usta Mehmed b. ( ) kalaycı, Mehmed Çelebi b. Kuluoğlu, Hasan b. Şükrullah, Mehmed b. Ramazan ve gayruhüm.