İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 760 Hüküm no: 1026 Orijinal metin no: [102b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Hüseyin Ağa b. Mustafa’nın mirasının satılarak parasının korunması için vâsiye izin verildiği Mahmiye-i İstanbul’da Süleymaniye mahallesinde sâkin iken bundan akdem vefât eden el-Hâc Hüseyin Ağa b. Mustafa’nın verâseti, zevce-i metrûkesi Sâfiye Hâtun bt. Abdullah ve evlâd-ı sıgārı Hatîce ve Râbia ve Fâtıma ve Ümmügülsüm ve karındaşları olup diyâr-ı Mora’da Kartine kazâsına tâbi‘ Gerni nâm karyede sâkinlerinden Süleyman Ağa ve Mahmud Ağa ibney Mustafa’ya münhasıra olduğu şer‘an mütehakkik oldukdan sonra sıgār-ı mezbûrûnun tesviye-i umûruna vasiyy-i muhtârı olan umdetü’l-emâcid ve’l-ekârim râfi‘ü hâzihi’r-rakīm el-Hâc Abdurrahman Ağa b. el-Hâc Yusuf meclis-i şer‘-i hatîrde bi’l-vesâye takrîr-i kelâm ve tastîr-i merâm edip mezbûrân Süleyman ve Mehmed Ağa karındaşları mezkûr el-Hâc Hüseyin Ağa’nın vefâtı mesmû‘ları olup bu âna değin gelmemekle, müteveffâ-yı mezkûr el-Hâc Hüseyin Ağa’nın tereke-i menkūlesine âfet isâbet edip mütegayyib ve sirkat olmak ihtimâli mukarrer olduğu ecilden değer bahâları ile bey‘ olunup esmânı hıfz olunmak sıgār-ı mezbûrun ile gāibân-ı mezkûreyne beher vechile enfa‘ ve evlâ olmağın vech-i muharrer üzre bey‘ ve esmânını hıfzla bana kıbel-i şer‘den izin verilmek bi’l-vesâye matlûbumdur dedikde kaziyye vech-i meşrûh üzre idiği sikāt ahyâr ihbârlarıyla hâkim-i muvakki‘-i kitâb tûbâ-lehû ve hüsnü me’âb hazretleri huzûrunda müte‘ayyin ve zâhir olmağın değer bahâ ile tâlib olan kimesnelere bey‘a izin verilmeğin, mâ vaka‘a bi’t-taleb ketb olundu. Hurrire fî evâili şehri Rebî‘ilâhir li sene 1074. Şuhûdü’l-hâl: Muslu Usta b. Hakkı, Şaban Ağa b. Ali, Mustafa Efendi Mehmed, Abdullah Efendi b. Himmet, Osman b. Mehmed, Mehmed Bey b. Ali ve gayruhüm.