İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 760 Hüküm no: 1027 Orijinal metin no: [103a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa’nın hayatta iken malının üçte birini vakf ettiği ortaya çıktığından Hacer Hâtun’da olan bu paranın alındığı Zikri âtî vakfa kıbel-i şer‘den mütevellî nasb olunan işbu râfi‘ü’l-kitâb Yunus b. Müyesser mahfil-i kazâda, medîne-i Ebâ Eyyûb-i Ensârî mahallâtından Çavuş Kasım mahallesinde sâkin iken bundan akdem vefât eden Mehmed Ağa b. Turâbî’nin verâseti, sulbî kebîr oğlu Ali Çelebi’ye ve sulbiye kebîr kızı Hacer nâm hâtuna münhasıra olduğu şer‘an mütehakkik oldukdan sonra tereke-i müteveffâ-yı mezbûra vâzı‘atü’l-yed olan mezbûre Hacer Hâtun mahzarında bi’t-tevliyye üzerine takrîr-i da‘vâ edip müteveffâ-yı mezbûr Mehmed Ağa hâl-i marazında bi emrillâhi te‘âlâ dâr-ı fenâdan dâr-ı ukbâya intikāl ve irtihâl eylediğimde cemî‘-i malımın sülüsü vakf olup yed-i mütevellî ile ale’l-vechi’l-helâl istirbâh ve istinmâ olunup hâsıla olan gallâtından re’y-i hâkimü’ş-şer‘le zikr olunan Çavuş Kasım câmi‘-i şerîfi’nin Cum‘a huddâmına vezâyif ta‘yîn olunup fazlası câmi‘-i mezkûrun lede’l-iktizâ meremmet ve imâretine sarf oluna deyû vasiyyet edip musırran alâ îsâ’ihî fevt oldukda cemî‘ malının sülüsü yüz elli bin akçe olmağla mezbûre Hacer’in hissesine isâbet eden elli bin akçeyi bi hasebi’l-irsi’ş-şer‘î tereke-i müteveffâ-yı mezbûrdan isâbet eden hisse-i makbûzasından mezkûre Hacer bana teslîme tenbîh olunmak bi’t-tevliyye matlûbumdur, suâl olunsun dedikde gıbbe’s-suâl mezbûre Hacer cevâbında tereke-i müteveffâ-yı mezbûra vaz‘-ı yedini ve müteveffâ-yı mezbûrun cemî‘ malının sülüsü yüz elli bin akçe olduğunu ikrâr ve vech-i meşrûh üzre vasiyyeti inkâr edicek mütevellî-i mezkûrdan müdde‘âsını mübeyyine beyyine taleb olundukda udûl-i müslimînden mahalle-i mezbûre sükkânından Mustafa Efendi b. İlyas ve medîne-i mezbûrede Câmi‘-i Kebîr mahallesinden İbrahim Beşe b. Hasan ve Kara Mehmed b. Abdullah nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezkûre Hacer babası müteveffâ-yı mezbûr Mehmed Ağa b. Turâbî hâl-i marazında bizim huzûrumuzda bi emrillâhi te‘âlâ dâr-ı fenâdan dâr-ı ukbâya intikāl ve irtihâl eylediğimde cemî‘ malımın sülüsü vakf olup yine mütevellî ile alâ vechi’l-helâl istirbâh ve istinmâ olunup hâsıla olan gılâlden re’y-i hâkimü’ş-şer‘le zikr olunan Çavuş Kasım câmi‘-i şerîfi’nin Cum‘a huddâmına vezâyif ta‘yîn olunup fazlası câmi‘-i mezbûrun lede’l-iktizâ meremmet ve imâretine sarf oluna deyû vasiyyet edip musırran alâ îsâ’ihî fevt oldukda, cemî‘ malının sülüsü yüz elli bin akçe olduğuna şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mütevellî-i mezkûr Yunus meclis-i şer‘de mezbûre Hacer mahzarında bi’t-tevliyye ikrâr edip bâlâda edâ ve teslîmine hükm-i şer‘î lâhık olan elli bin akçeyi mezbûre Hacer’den tamânen ahz u kabz edip min ba‘d mezbûre Hacer’de bir akçe ve bir habbe kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Es-Seyyid Hüseyin Efendi [b.] es-Seyyid Abdülkādir, es-Seyyid Abdülbâkī [b.] Çelebi Receb, Şaban b. Mustafa, Hacı İbrahim b. Mustafa, İbrahim b. Murad, Oruc Beşe b. İbrahim.