İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 764 Hüküm no: 1034 Orijinal metin no: [103b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mustafa’nın aynı mahalledeki arsa ve üzerindeki evini Mustafa Çelebi’ye sattığı Mahmiye-i İstanbul’da Manisalı Çelebi mahallesinde sâkin Mehmed Çelebi b. Mustafa meclis-i şer‘-i hatîrde işbu râfi‘ü’l-kitâb Mustafa Çelebi b. Memi mahzarında ikrâr ve takrîr-i kelâm edip arsası merhûm Rıdvan Paşa b. Ayas Bey zimmetinden icâre-i mu‘accele-i ma‘lûme deyû bir akçe ücret-i müeccele ile taht-ı tasarrufumda ve üzerinde vâki‘ ebniyesi memlûkem olup mahalle-i mezbûrede vâki‘ üç tarafı vakf-ı mezbûra ve bir tarafı tarîk-i âma müntehî tahtânî iki oda ve bir sofa ve avlu ve kenîfi hâvî menzilin arsasını, bin akçe bedel mukābelesinde izn-i mütevellî-i vakf-ı merkūm ile mezkûr Mustafa Çelebi’ye ferâğ ve tefvîz ve üzerinde vâki‘ ebniye-i memlûkemi mezbûr Mustafa Çelebi’ye yirmi bin üç yüz akçeye bâtten bey‘ edip her birini teslîm ol dahi arsa-i mezbûreyi tefevvüz ve ebniye-i mezbûreyi iştirâ ve kabûl ve her birini tesellüm ve kabz eyledikden sonra bedel-i mezbûr bin akçe ve semen-i mezkûr yirmi bin üç yüz ki cem‘an yirmi bir bin üç yüz akçeyi müşterî-i mezbûr Mustafa Çelebi yedinden tamâmen ahz u kabz edip min ba‘d arsa-i mezbûrede ve ebniye-i memlûke-i mesfûrede benim için hak ve alâka kalmadı, keyfe mâ yeşâ’ mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis aşer şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mehmed Efendi [b.] Osman el-hatîb, Bayram b. Yusuf, Hasan Efendi el-İmâm, Mustafa Efendi el-İmâm, Mustafa Beşe b. Hasan, Mehmed Efendi el-Müezzin ve gayruhüm.