İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 765 Hüküm no: 1035 Orijinal metin no: [103b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gemi kaptanı Duka v. Pireşkova ile ortakları aralarında hiçbir davaları kalmadığı Sefîne reislerinden Duka v. Pireşkova nâm zimmî mahfil-i kazâda yine tâife-i mezbûreden işbu bâ‘isü’s-sifr Simo v. Pireşkova ve Cani Reis v. Manol nâm zimmîler muvâcehesinde ikrâr ve takrîr-i kelâm edip merkūmân ile şerîkler olup şayka ta‘bîr olunur sefînenin nısfı benim ve nısf-ı âharı merkūmân Simo ve Cani Reis’in olup bu âna değin müşâ‘an mutasarrıflar idik hâlâ zikr olunan sefîneyi âhara bey‘ etmekle mukaddemâ şerîkler iken navluna ve sâir eşyâya müte‘allik Tuz seferinden ve Abaza seferinden ve Sinop seferinden beynimizde nice ahz u i‘tâ ve mu‘âmelât-ı şettâ vâkı‘a olmuşidi. El-hâletü hzihî târih-i kitâba gelince ben merkūmânın anlar dahi benim zimmetimi ibrâ-i âmm-ı kātı‘ü’n-nizâ‘la ibrâ ve iskāt eyledik ba‘de’l-yevm her birimizden husûs-ı mezbûre müte‘allika da‘vâ zuhûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘i aşer min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Osman Çelebi b. İslâm, Mustafa b. ( ) Kapudân, Mehmed b. Hüseyin er-Reis, Mehmed Çelebi yelkenci, Dilaver b. Abdullah, Kenan Efendi b. ( ) er-Reis ve gayruhüm.