İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 765 Hüküm no: 1036 Orijinal metin no: [104a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Tahir’in oğlu Musa’nın evdeki hissesini vâlidesine satıp ücretini de hibe ettiği Mahmiye-i İstanbul’da Mi‘mâr Sinan mahallesinde sâkin iken bundan akdem vefât eden Mehmed b. Tâhir’in verâseti zevce-i metrûkesi Vildan bt. Abdullah nâm hâtun ile sulbî oğlu Musa ve sulbiye kebîre kızı Ayşe’ye münhasıra olup ve tashîh-i mes’eleleri yirmi dört sehimden i‘tibâr olunup sihâm-ı merkūmenin üç sehimi mezbûre Vildan Hâtun’a ve on dört sehimi mezbûr Musa’ya ve yedi sehimi mezbûre Ayşe’ye isâbet eylediği şer‘an zâhir ve müte‘ayyin oldukdan sonra mezbûr Musa meclis-i şer‘-i hatîr-i lâzımü’t-tevkīrde vâlidesi mezbûre Vildan Hâtun mahzarında bi tav‘ihî ikrâr ve takrîr-i kelâm edip babam müteveffâ-yı mezbûrun muhallefâtından olup mahalle-i mezbûrede vâki‘ bir tarafı Oruc b. Abdülehad mülkü ve iki tarafı Sâime Hâtun mülkü ve bir tarafı tarîk-i âm ile mahdûd bir fevkānî beyti ve bir tahtânî beyti ve sofayı ve su kuyusunu ve cüneyneyi müştemil menzilin yirmi dört sehimden bana isâbet eden on dört sehim hisse-i şer‘iyyemi, vâlidem mezbûre Vildan Hâtun’a on iki bin nakid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı şer‘î ile bey‘ ve teslîm vâlidem mezbûre Vildan Hâtun dahi vech-i muharrer üzre iştirâ ve kabûl ve tesellüm ettikden sonra semeni olan meblağ-ı mezbûr on bin akçeyi vâlidem mezbûre Vildan Hâtun’a hibe-i sahîha-i şer‘iyye ile hibe ve temlîk, ol dahi meclis-i hibede ittihâb ve kabûl eyledi ba‘de’l-yevm menzil-i mezbûrda olan hisse-i şâyi‘am vâlidem merkūme Vildan Hâtun’un mülk-i müşterâsıdır menzil-i mezbûrda ve semeninde vechen mine’l-vücûh ve sebebin mine’l-esbâb hak ve alâkam kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmini aşer fî Rebî‘ilâhir sene 1074. Şuhûdü’l-hâl: Mehmed Efendi b. ( ) el-İmâm, Teberdârzâde İbrahim Çelebi, Ahmed Çelebi b. ( ) el-Müezzin, Mahmud b. Halil, Mahmud b. Şükrullah, Mehmed b. Hüsrev ve gayruhüm.