İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 766 Hüküm no: 1037 Orijinal metin no: [104a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Ali’nin, oğlu el-Hâc Ali’ye verilmek üzre emanet bıraktığı paranın yerine ulaştırıldığı Mahmiye-i İstanbul’da Firûz Ağa mahallesinde sâkin iken bundan akdem vefât eden el-Hâc Ali nâm kimesnenin sulbî kebîr oğlu ve bi’l-inhisâr vârisi olan el-Hâc Ali nâm kimesne mahfil-i kazâda, müteveffâ-yı mezbûrun zevcesi Kâmile bt. Abdullah ile Mehmed Efendi b. Mustafa mahzarında üzerine takrîr-i da‘vâ edip babam mezbûr el-Hâc Ali vefât eyledikde ben diyâr-ı Mısır’da olmağla vefâtından mukaddem bana îsâl ve teslîm etmek için dört yüz altın ve kırk kıt‘a riyâlî guruş ve yedi yüz Mısır parası mezkûrâna def‘ ve teslîm edip anlar dahi ba‘de’l-kabz babam mezbûr el-Hâc Ali vefât ettikden sonra otuz altın ile yedi yüz parayı bana def‘ ve teslîm ben dahi ahz u kabz edip mâ‘adâyı taleb ederin suâl olunsun dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ meblağ-ı mezbûrdan müdde‘î-i mezkûr kabzına mu‘terif olduğu meblağ-ı mezbûrdan ma‘adâyı müdde‘î-i mezbûra îsâl ve teslîm için müteveffâ-yı mezkûrdan hayâtında ahz u kabz etmeyip elân üzerine reddi vâcib olmadığına mezbûrâna yemîn teklîf olunduklarında, anlar dahi alâ vefki’l-mes’ûl yemîn billâhi te‘âlâ etmeğin mûcebince mâ vaka‘a bi’t-taleb ketb olundu. Fi’l-yevmi’r-râbi‘i aşer [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Abdi Çelebi b. Hasan, Resûl b. Rıdvan, Ömer b. Rıdvan ve gayruhüm.