İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 773 Hüküm no: 1045 Orijinal metin no: [105b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Bey b. Arslan’ın ölen Ali Ağa’ya borcu olduğunu kabul ettiği Fi’l-asl kasaba-i Kili sükkânından olup Mahmiye-i İstanbul’da Haydarhâne mahallesinde sâkin Mahmud Bey b. Arslan nâm bevvâb-ı sultânî meclis-i şer‘de bundan akdem Baba Hasan mahallesinde sâkin iken vefât eden Ali Ağa b. Nasûh’un verâseti, zevce-i metrûkesi Şahbaz bt. Abdullah’a ve sulbî kebîr oğlu Osman Ağa’ya ve sulbiye sagīre kızı İsmihan’a münhasıra olduğu şer‘an zâhir ve müte‘ayyin oldukdan sonra merkūm Osman ile sagīre-i mezbûrenin vâlidesi ve kıbel-i şer‘den mansûbe vasiyyesi olan mezbûre Şahbaz Hâtun tarafından husûs-ı âti’l-beyânı tasdîke sâbitü’l-vekâle vekîli olan Yusuf Bey b. Abdullah mahzarlarında ikrâr ve takrîr-i kelâm edip müteveffâ-yı mezbûr Ali Ağa’ya cihet-i deyn-i şer‘îden yirmi sekiz bin akçe zimmetimde deynim olup kable’l-ahz mezbûr Ali Ağa vefât etmekle meblağ-ı merkūm, merkūmuna irsen intikāl eylemişdi hâlâ zikr olunan meblağ-ı merkūmu yirmi sekiz bin akçe merkūmuna zimmetimde vâcibü’l-edâ ve lâzımü’l-kazâ deynimdir dedikde mukırr-ı mezbûr Mahmud Bey ikrâr-ı meşrûhunda merkūm Osman Ağa ile vekîl-i mezbûr Yusuf tasdîk etmeğin mâ vaka‘a bi’t-taleb ketb olundu. Fi’l-yevmi’s-sânî aşer [min] şehri Rebî‘ilâhir sene 1074. Şuhûdü’l-hâl: Ahmed Efendi b. Ali el-Müderris, es-Seyyid Fazlı Çelebi b. es-Seyyid Ömer, Mehmed Ağa b. Sunullah, Mustafa Çelebi b. Rıdvan Ağa ve gayruhüm.