İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 774 Hüküm no: 1046 Orijinal metin no: [105b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çizmeci Frenk ve İskender’in evlerini Hadim Ali Ağa vakfına bey‘ bi’l-istiğlâl yoluyla sattıkları Mahmiye-i İstanbul’da Unkapanı hâricinde çizmeci tâifesinden Frenk ve İskender veledey Dadur nâm Ermeniler meclis-i şer‘-i hatîr-i lâzımü’t-tevkīrde Havâss-ı Aliyye müzâfâtından medîne-i Ebâ Eyyûb-i Ensârî’de vâki‘ Hâdim Ali Ağa vakfına hâlâ mütevellî olan Davud Efendi b. Mehmed mahzarında her biri ikrâr ve takrîr-i kelâm edip ale’l-iştirâki’s-seviy silk-i mülk-i sahîhimizde münselik olup mahmiye-i İstanbul’da Tahtaminâre mahallesinde vâki‘ bir tarafdan Çakırcı Halil mülkü ve bir tarafdan merhûm Mehmed Paşa vakfı olup Matyoz nâm zimmî tasarrufunda olan menzil ve iki tarafdan tarîk-i âma müntehî mülk menzilimi bi cümleti’t-tevâbi‘ ve’l-levâhık müteveffâ-yı mezbûre yüz yirmi beş riyâlî guruşa bi tarîki’l-istiğlâl bey‘ ve teslîm ol dahi vakf-ı mezbûr malıyla iştirâ ve kabûl ve kabz ve tesellüm eyledikden sonra semeni olan meblağ-ı mezbûr yüz yirmi beş riyâlî guruşu mütevellî-i mezbûr yedinden tamâmen ahz u kabz eylediğimden sonra yine menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan üç sene tamâmına değin beher sene bin yüzer akçeye îcâr ve teslîm biz dahi vech-i muharrer üzre istîcâr ve kabûl ve kabz ve tesellüm eyledik dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-merkūm. Şuhûdü’l-hâl: Ali Çelebi b. ( ) el-Kâtib, Mehmed Çelebi b. ( ) hânî, Mustafa Çelebi b. ( ) hânî, ve gayruhüm mine’l-huzzâr.