İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 775 Hüküm no: 1048 Orijinal metin no: [106a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdullah’ın eski eşi Mustafa Beşe’ye sattığı evin parasını hibe etmediğinin ortaya çıktığı Mahmiye-i İstanbul’da Fâtıma Sultan mahallesinde sâkine Sâliha bt. Abdullah nâm hâtun meclis-i şer‘-i hatîr-i lâzımü’t-tevkīrde sâbıkan zevci olan Mustafa Beşe b. Ömer mahzarında üzerine da‘vâ ve takrîr-i kelâm edip mezbûr Mustafa Beşe ile zevciyyet beynimizde kāime iken silk-i mülk-i sahîhimde münselik olup mahalle-i mezbûrede vâki‘ ma‘lûmü’l-hudûd mülk menzilimi mezbûr Mustafa Beşe’ye on bin akçeye bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl ve kabz eyledikden sonra semeni olan meblağ-ı mezbûr on bin akçe mezbûr Mustafa Beşe’nin zimmetinde kalmışdi hâlâ mezbûrdan taleb ederim suâl olunsun dedikde gıbbe’s-suâl mezbûr Mustafa Beşe cevâbında kaziyye bâlâda tafsîli mürûr ettiği vech üzre olduğunu ikrâr, lâkin menzil-i merkūmun semeni olan meblağ-ı mezbûr on bin akçeyi müdde‘iyye-i mezbûre Fâtıma bana ba‘de’l-kabz hibe-i sahîha-i şer‘iyye ile hibe etmeğin temlîk ve teslîm ben dahi meclis-i hibede ittihâb ve kabûl ve kabz ve tesellüm eyledim deyû def‘le mukābele edicek gıbbe’s-suâl ve’l-inkâr merkūm Mustafa Beşe’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ zevciyyet beynlerinde kāim iken mezbûr Mustafa Beşe’ye menzil-i mezbûrun semeni olan meblağ-ı mezbûr on bin akçeyi ba‘de’l-kabz mezbûr Mustafa Beşe’ye hibe-i sahîha etmediğine mezbûre Fâtıma’ya yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince meblağ-ı mezbûr on bin akçeyi müdde‘iyye-i mezbûre[ye] edâ ve teslîme mezbûr Mustafa Beşe’ye tenbîh birle mâ hüve’l-vâki‘ bi’t-taleb ketb olundu. Hurrire fî târihi’l-mezbûr li’s-seneti’l-merkūm. Şuhûdü’l-hâl: Abdi Çelebi b. Hasan, Şükrullah b. Mustafa, Veli b. Mahmud ve gayruhüm mine’l-hâzırîn.