İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 776 Hüküm no: 1049 Orijinal metin no: [106a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kızı Fâtıma’yı Osman b. Muhsin’le evlendirmek üzre aldığı rüşveti geri vermesi için Ayşe bt. İsmail’e süre verildiği Mahmiye-i İstanbul’da Sultan mahallesinde sâkin Osman b. Muhsin nâm kimesne meclis-i şer‘-i hatîrde Ayşe bt. İsmail nâm hâtun mahzarında ikrâr ve i‘tirâf edip mezkûre Ayşe sadriyye kızı Fâtıma bt. Mehmed’i bana tezvîc etmek için bi tarîki’r-rüşvet on bin beş yüz akçemi ahz u kabz etmekle taleb ve da‘vâ eylediğimde mezbûre Ayşe bi’l-külliye inkâr edicek beynimizde münâza‘ât-ı kesîre ve muhâsamât-ı şedîde vukū‘undan sonra vesâtat-ı muslihîn ile da‘vâ-yı mezkûremden mezbûre Ayşe beni beş bin fıddî râyic fi’l-vakt semen üzerine inşâ-i akd-i sulh eyledikde ben dahi sulh-ı mezbûru kabûl eylediğimden sonra mezkûre Ayşe bedel-i sulh-ı mezbûru hâlâ edâya iktidârı olmadığı ecilden istîcâl etmeğin ben dahi meblağ-ı mezbûr bu bin akçeyi târih-i kitâbdan yirmi gün tamâmına değin bana edâ etmek üzre te’cîl edip ol dahi ecel-i mezbûru kabûl eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâmin aşer min Rebî‘ilâhir sene 1074. Şuhûdü’l-hâl: Mustafa Efendi b. Durak, Hasan Bey b. Sefer, Hasan Bey b. İskender, Hasan Çelebi b. Şaban ve gayruhüm.