İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 776 Hüküm no: 1050 Orijinal metin no: [106a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Borçları sebebiyle hapsedilen Yüheyya v. Yasef’in çok fakir olduğuna şehadet edilmesiyle serbest bırakıldığı Zikri âtî deyn için sicn-i sultânîde haps olunup mahmiye-i İstanbul’da Budin cemâ‘atinden Yüheyya v. Yasef nâm yahudiden vech-i âtî üzre istişhâd-ı şer‘î sudûrundan sonra mahmiye-i İstanbul’da Balat kurbunda Tahtaminâre mahallesinde sâkin Mehmed b. Abdullah nâm kimesne ve Sisile cemâ‘atinden Yako v. Avraham ve Zeyrek cemâ‘atinden Yüheyya v. Sahmul ve Aragon cemâ‘atinden İlya v. Yeriya ve Nesim v. Haydar ve Samadya cemâ‘atinden Hoyran v. Avraham ve Ohri cemâ‘atinden Aslan ve Eğriboz cemâ‘atinden David v. Efraim nâm yahudiler meclis-i şer‘-i hatîrde müsteşhid-i mezbûr Yüheyya’nın dâyinleri Budin cemâ‘atinden İlya v. Avraham ve zevcesi Eşter v. Mosi muvâcehelerinde her biri şehâdet-i şer‘iyye edip fi’l-vâki‘ mezbûrân İlya ve Eşter v. Koçyüz yetmiş miskāl üç çift otuz bilezik ve seksen riyâlî guruş için târih-i kitâbdan dokuz ay mukaddem emr-i hâkimü’ş-şer‘le sicn-i sultânîye haps ettirip işbu güne değin ıtlâk olunmamışdı. Lâkin medyûn-ı mezbûr Yüheyya müflis ve fakīr ve mu‘dim olup üzerinde lâbis olduğu libâsından gayrı ism-i mal ıtlâk olunur bir şey ve bir habbesi olmadığı ma‘lûmumuzdur. Biz bu husûsa bu vech üzre şâhidleriz şehâdet dahi ederiz dediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebince ba‘de’t-tahlîf husûs-ı mezbûr dâ‘iyân-ı mezbûrân huzûrlarında olmağla mal ve yesârı zâhir oluncaya değin bilâ-kefîl mezbûr Yüheyya hapisden ıtlâk olunup mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Rebî‘ilâhir sene 1074. Şuhûdü’l-hâl: Ali Bey b. Muharrem, Abdi Çelebi b. Hasan, Mehmed b. Mahmud ve gayruhüm.