İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 779 Hüküm no: 1053 Orijinal metin no: [107a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkadir b. Hızır’ın David’de alacağının olmadığı Mahrûse-i Galata a‘mâlinden kasaba-i Tophâne’de Karabaş mahallesi sâkinlerinden olup tüccâr tâifesinden Abdülkādir b. Hızır nâm kimesne dîvân-ı sa‘âdet-makrûnda ma‘kūd olan mahfil-i kazâda, mahrûse-i mezbûrede Bereketzâde mahallesi sükkânından iken hâlik olan David nâm Ermeni’nin sulbî kebîr oğlu Kirkor nâm Ermeni mahzarında üzerine da‘vâ edip hâlik-i mezbûr David’e hayâtında yetmiş senesi Recebü’l-müreccebi’nde eşyâ-i memlûkemden bir elmas hâtemi altı yüz kıt‘a riyâlî guruşa ve bir murassa‘ sorgucu bin sekiz yüz guruşa bey‘ ve teslîm ol dahi vech-i muharrer üzre iştirâ ve kabûl ve kabz eyledikden sonra meblağ-ı mezbûrun iki yüz riyâlî guruşunu kabz edip mâ‘adâ olan iki bin iki yüz riyâlî guruşu bana edâ etmeden zimmetinde iken hâlik olmuşdur hâlâ meblağ-ı bâkī-i mezbûru hâlik-i mezbûrun tereke-i vâfiyyesinden bana teslîme mezbûre Kirkor’a tenbîh olunmak matlûbumdur dedikde gıbbe’s-suâl mezbûr Kirkor cevâbında husûs-ı mezbûru bi’l-külliye inkâr edicek müdde‘î-i mezbûrdan müdde‘âsına mübeyyine beyyine taleb olundukda ityân-ı beyyine için birkaç def‘a dîvânda istimhâl edip her kerede mehl-i şer‘î ile imhâl olunup ityân-ı beyyineye kudreti olmadığından gayrı yemîn vermemeğin, mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ramazan Ağa b. Abdullah, Mustafa Efendi b. Musa el-İmâm, Ali b. el-Hâc Veli, Mustafa b. Mehmed, Ali Ağa b. Hüseyin ve gayruhüm mine’l-huzzâr.