İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 780 Hüküm no: 1054 Orijinal metin no: [107a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Melek bt. Dadur’un oğlu Antana’da alacağı kalmadığı Mahmiye-i İstanbul’da Langa kurbunda sâkine Melek bt. Dadur nâm Ermeniyye meclis-i şer‘-i hatîr lâzımü’t-tevkīrde sadrî oğlu Antana v. Selviyar nâm Ermeni mahzarında ikrâr ve takrîr-i kelâm edip oğlum mezbûr Antana zimmetinde deyn-i şer‘îden olan yüz elli guruş hakkımı yedinden bi’t-tamâm alıp kabz eyledikden sonra elli guruşunu kendiye hibe ve teslîm edip ol dahi ittihâb ve kabûl eyleyip yirmi guruşunu dahi Kudüs-i şerîf’e irsâl eyleyip bâkī seksen guruşunu dahi mesârifime sarf ve istihlâk eyledim min ba‘d meblağ-ı mezbûr yüz elli guruşdan oğlum merkūm Antana zimmetinde bir akçe ve bir habbe hakkım kalmamışdır dedikde gıbbe’t-tasdîk mâ vaka‘a bi’t-taleb ketb olundu. Şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ahmed Çelebi b. Süleyman Çelebi, Mehmed Beşe b. Ali, Veli b. Mahmud, Şükrullah b. Mustafa ve gayruhüm.