İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 780 Hüküm no: 1055 Orijinal metin no: [107a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Abdülmennân vakfına ait evin Osman Efendi’ye kiralandığı Mahmiye-i İstanbul’da Kazancı mahallesinde vâki‘ menzil-i mevkūf-i âti’l-beyânın kıbel-i şer‘den hasbî mütevellîsi olup mahalle-i mezkûre ahâlîsinden Mehmed Efendi b. Hüseyin meclis-i şer‘-i hatîr lâzımü’t-tevkīrde dergâh-ı âlî -dâme mahfûfen bi’l-me‘âlî- yeniçerilerinin kethüdâsı olup hâlâ seferde ordu-yı hümâyûnda olan umdetü’l-emâcid ve’l-mekârim Mustafa Ağa b. Hüseyin kıbelinden tasdîk-i âti’l-beyâna vekîl olup şer‘an vekâleti zahrü’l-a‘yân Mehmed Ağa b. İbrahim ve mumcu Mustafa Beşe b. Mehmed nâm kimesneler şehâdetleri ile sâbite olan umdetü erbâbi’t-tahrîr ve’l-beyân Osman Efendi b. Abdurrahman mahzarında bi’t-tevliyye takrîr-i kelâm ve bast-ı merâm edip mahalle-i merkūmede vâki‘ merhûm Hasan Ağa b. Abdülmennân vakf-ı müsecceli olup hâlâ ber mûceb-i şart-ı vâkıf nevbet-i tasarruf mahalle-i mezkûre mescid-i şerîf imâmına meşrût olup bir tarafı esirci Veli mülkü ve bir tarafı Atmeydanı ve bir tarafı müvekkil-i mûmâ-ileyh Mustafa Ağa’nın bahçesi ve bir tarafı tarîk-i âm ile mahdûd arsası bennâ zirâ‘ı ile tûlen kırk dört zirâ‘ ve arzen ba‘zan altı zirâ‘ ve ba‘zan sekiz zirâ‘ olan vakıf menzil mürûr-ı eyyâm ve kürûr-ı şühûr-ı a‘vâm ile harâbe müşrif olup arsa-i sırfa kalıp vakfında dahi imâret ve meremmetine müsâ‘ade olmayıcak menzil-i mezbûr icâre-i mu‘accele ve mukāta‘a-i misli ile verilmek her vechile vakf-ı mezbûra enfa‘ ve evlâ olmağın hâlâ menzil vakf-ı mezbûru icâre-i mu‘accele misli olan üç bin akçe ve senede iki yüz akçe mukāta‘a-i misli ile müvekkil-i mûmâ-ileyh Mustafa Ağa’ya tevliyyetim hasebiyle îcâr ettiğimde vekîl-i müşârün-ileyh Osman Efendi dahi müvekkil-i mûmâ-ileyh için istîcâr ve kabûl ve tesellüm eyledikden sonra zikr olunan mu‘accele-i mersûme üç bin akçeyi vekîl-i müşârün-ileyh yedinden vakıf için kabz edip menzil-i mezbûru vekîl-i müşârün-ileyhe teslîm eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn şehri Rebî‘ilâhir sene 1073. Şuhûdü’l-hâl: Keşfî Mustafa Efendi b. Muharrem, İbrahim Beşe b. Derviş, Abdi Çelebi b. Hüseyin, Muharrem b. Abdullah ve gayruhüm.