İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 781 Hüküm no: 1056 Orijinal metin no: [107a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Kalender’in mirasçılarının haklarını aldıkları Mahmiye-i İstanbul’da Cebecibaşı mahallesi sükkânından iken vefât eden Hüseyin b. Kalender’in zevce-i metrûkesi Râbia bt. Ramazan ve sulbiye kebîre kızı Müslime nâm hâtun meclis-i şer‘-i hatîr-i lâzımü’t-tevkīrde müteveffâ-yı mezbûrun sulbî kebîr oğlu Mustafa Ağa mahzarında her biri ikrâr ve i‘tirâf edip müteveffâ-yı mezbûrdan bize isâbet eden hisse-i şer‘iyyemezi terekesine vâzı‘u’l-yed olan mezbûr Mustafa Ağa yedinden tamâmen ahz u kabz eyledik. Min ba‘d tereke-i müteveffâ-yı mezbûra müte‘allika mezbûr Mustafa ile da‘vâ ve nizâ‘ımız yoktur dediklerinde, gıbbe’t-tasdîk merkūm Mustafa Ağa meclis-i şer‘de mezbûre Râbia Hâtun mahzarında ikrâr ve i‘tirâf edip silk-i mülkümde münselik olup Kangırı sancağında tâbi‘ Karaviran kasabasında vâki‘ beynimizde hudûdu ma‘lûm mülk bahçemi mezbûre Râbia’ya bi cümleti’t-tevâbi‘ ve’l-levâhık beş bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı merkūm beş bin akçeden mezbûre Râbia’nın zimmetini ibrâ eyledim ve kendi malımdan mezbûre Râbia’ya beş yüz nakid akçe ve bir köhne yemeni yorgan ve bir gömlek ve bir köhne ferâcemi hibe-i sahîha-i şer‘iyye ile hibe ve teslîm ol dahi ittihâb ve kabûl ve kabz ve tesellüm eyledi dedikde gıbbe’t-tesâdukı’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâbi‘i aşer şehri Rebî‘ilâhir sene 1074. Şuhûdü’l-hâl: Fahrü’l-eimme Mehmed Efendi b. Ali el-İmâm, Mustafa Çelebi b. ( ), Ömer Efendi b. Mehmed Efendi, Ahmed Efendi b. Mehmed el-İmâm, Yusuf Efendi b. ( ) ve gayruhüm.