İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 782 Hüküm no: 1057 Orijinal metin no: [107b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. İbrahim’in Mehmed b. Süleyman’dan boşandığı Mahmiye-i İstanbul’da Molla Ahaveyn mahallesinde sâkine Ayşe bt. İbrahim nâm hâtun meclis-i şer‘-i hatîr-i lâzımü’t-tevkīrde işbu bâ‘isetü’l-kitâb Mülâyim bt. Abdullah nâm hâtun mahzarında ikrâr-ı tâm ve takrîr-i kelâm edip merkūme Mülâyim’i bundan akdem medîne-i Kütahya’da sâkin zevcim Mehmed b. Süleyman nâm kimesneye bir gelsin tâ beni tatlîk eylesüz deyû gönderdiğimde hul‘a vekîl etmemişken mezbûre varıp vekîlim deyû mehr-i müeccelim olan sekiz bin akçe üzerine fuzûlen hul‘ olup geldikde ben dahi hul‘-ı mezbûru istimâ‘ ettiğimde tecvîz eyledim min ba‘d zevcim mezbûr Mehmed ile mehr-i müeccelime müte‘allika da‘vâ ve nizâ‘ım yoktur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Şuhûdü’l-hâl: Ali Efendi b. Mehmed el-İmâm, Ömer Efendi b. Mehmed, Muharrem Çelebi b. Abdullah, Abdi Çelebi b. Hüseyin ve gayruhüm.